વિશ્વ / ડોનાલ્ડ ટ્રમ્પ આજે ક્યારે લેશે રાષ્ટ્રપતિ પદના શપથ? અહીં જોઈ શકશો લાઈવ સ્ટ્રીમિંગ

ડોનાલ્ડ ટ્રમ્પ આજે એટલે કે, 20 જાન્યુઆરીએ અમેરિકાના 47મા રાષ્ટ્રપતિ તરીકે શપથ લેશે. આ ઐતિહાસિક અવસરની તમામ તૈયારીઓ પૂરી કરી દેવામાં આવી છે. આ વખતે જોરદાર ઠંડીને કારણે શપથ ગ્રહણ સમારોહ US કેપિટોલના રોટુન્ડાની અંદર યોજાશે. તેમનો શપથ ગ્રહણ સમારોહ અમેરિકામાં બપોરે 12 વાગ્યે (EST) થશે. ભારતીય સમય મુજબ સમારોહ રાત્રે 10:30 વાગ્યે (IST) શરૂ થવાનો છે.

• શપથ કોણ અપાવશે?
  મુખ્ય ન્યાયાધીશ જોન રોબર્ટ્સ ડોનાલ્ડ ટ્રમ્પને શપથ અપાવશે. શપથ ગ્રહણ સમારોહ દરમિયાન ટ્રમ્પ બે બાઇબલનો ઉપયોગ કરશે. જેમાં એક તેમની માતાએ ભેટમાં આપી હતી તો બીજી લિંકન બાઇબલ હશે. અમેરિકાના રાષ્ટ્રપતિ દ્વારા લેવામાં આવતી શપથ 35 શબ્દોમાં હોય છે. આમાં રાષ્ટ્રપતિ તરીકે શપથ લેનાર વ્યક્તિ કહે છે કે, "I do solemnly swear (or affirm) that I will faithfully execute the Office of President of the United States, and will to the best of my ability, preserve, protect and defend the Constitution of the United States."

• શપથ ગ્રહણ બાદ ટ્રમ્પનો પહેલો દિવસ

ટ્રમ્પે પોતાના કાર્યકાળના પહેલા દિવસે 100થી વધુ એક્ઝિક્યુટિવ ઓર્ડર પર સાઈન કરવાની યોજના બનાવી છે. જેમાં સરહદ સુરક્ષા, ઊર્જા નીતિઓ અને અન્ય મહત્વના મુદ્દાઓનો સમાવેશ થાય છે.

• ક્યાં થશે ટ્રમ્પનો શપથ ગ્રહણ સમારોહ ?

અમેરિકાના 47માં રાષ્ટ્રપતિના શપથ ગ્રહણ સમારોહનું અનેક અમેરિકન ન્યૂઝ ટીવી ચેનલો પર લાઈવ ટેલિકાસ્ટ કરવામાં આવશે. જેમાં NBC, CNN, ABC, CBS, ફોક્સ ન્યૂઝ અને C-Span જેવા ન્યૂઝ નેટવર્કનો સમાવેશ થાય છે, જેના પર લોકો આ સમારોહ જોઈ શકે છે. આ સિવાય વ્હાઇટ હાઉસ તેની સત્તાવાર વેબસાઇટ પર સમારોહનું લાઇવ સ્ટ્રીમિંગ પણ કરશે, જેને બાકીના વિશ્વમાં રહેતા લોકો પણ જોઈ શકશે.

• મુખ્ય મહેમાનો

આ સમારોહમાં અનેક હસ્તીઓ હાજરી આપશે, જેમાં આર્જેન્ટિનાના રાષ્ટ્રપતિ જેવિઅર માઈલી, ઇટાલીના વડા પ્રધાન જિયોર્જિયા મેલોની, ભારતના વિદેશ પ્રધાન એસ. જયશંકર, જેફ બેઝોસ, માર્ક ઝુકરબર્ગ, એલોન મસ્ક અને મુકેશ અંબાણીનો સમાવેશ થાય છે. ચીનના રાષ્ટ્રપતિ શી જિનપિંગ આ સમારોહમાં હાજરી નહીં આપે તે તેમના એક પ્રતિનિધિને મોકલશે. તો પેન્સિલવેનિયા એવન્યુ પર એક સેલિબ્રેશન પરેડ યોજાશે, જેમાં લશ્કરી રેજિમેન્ટ, બેન્ડ અને ફ્લોટ્સ રજૂ કરવામાં આવશે. આ પરેડ શપથ ગ્રહણ સમારોહનો એક મહત્વપૂર્ણ હિસ્સો છે.

• શપથ ગ્રહણનો ખર્ચ
  અમેરિકામાં રાષ્ટ્રપતિના શપથ ગ્રહણ સમારોહનો ખર્ચ જાહેર કરમાંથી નહીં પરંતુ પ્રાઇવેટ ફંડિંગથી કરવામાં આવે છે. આ વખતે એપલના સીઈઓ ટિમ કૂક, માર્ક ઝુકરબર્ગ અને બીજા ઉદ્યોગપતિઓએ આ કાર્યક્રમ માટેનું ભંડોળ પૂરું પાડ્યું છે.

વધુ વાંચો : અમેરિકી રાષ્ટ્રપતિનો અભેદ કિલ્લો, વ્હાઇટ હાઉસમાં કેટલા રૂમ, સફેદ મહેલમાં નોકરોની ફૌજ

• 47મા રાષ્ટ્રપતિ તરીકે શપથ ગ્રહણ

અમેરિકાના 47મા રાષ્ટ્રપતિ તરીકે ડોનાલ્ડ ટ્રમ્પનો શપથ ગ્રહણ સમારોહ માત્ર અમેરિકા માટે જ નહીં પરંતુ સમગ્ર વિશ્વ માટે એક ઐતિહાસિક ક્ષણ મનાય છે. આ સમારોહમાં સામેલ થયેલા મુખ્ય મહેમાનો અને ટ્રમ્પનીપહેલા દિવસની યોજનાઓ તેને વધુ મહત્વપૂર્ણ બનાવે છે. ટ્રમ્પ પોતાનો બીજો કાર્યકાળ કેવી રીતે શરૂ કરે છે તે જોવાનું રસપ્રદ રહેશે.

બધા જ સમાચાર અને અપડેટ્સ મેળવવા માટે પ્લે સ્ટોર/ એપ સ્ટોર પર જઈને અથવા આ લાઈન પર ક્લિક કરીને ડાઉનલોડ કરો અમારી લેટેસ્ટ એપ