ધીરૂભાઈ ભીલે 102 વર્ષનાં માતાના ચરણ સ્પર્શ કરી આશીર્વાદ લીધા
આણંદ સાંસદ મિતેષ પટેલે કર્યું મતદાન
ભરતસિંહ સોલંકીએ મત આપી મતદાન કરવા અપીલ કરી
ગુજરાત વિધાનસભાની ચૂંટણીને લઈ હાલ રાજ્યમાં બીજા તબક્કાનું મતદાન ચાલી રહ્યું છે. તેવામાં હવે આજે અનેક નેતાઓએ ભારે ઉત્સાહ સાથે મતદાન કર્યું હતુ. જેમાં કોઈ નેતાએ પોતાની 102 વર્ષના માતાના ચરણ સ્પર્શ કરી જીતની આશા સાથે મતદાન કર્યું તો કોઈ નેતા ઢોલનગારા સાથે મતદાન કરવા પહોંચ્યા હતા. જ્યાં લોકોને વધુમાં વધુ મતદાન કરવાની અપીલ કરી હતી.
102 વર્ષનાં માતાના ચરણ સ્પર્શ કરી આશીર્વાદ લીધા
સંખેડા વિધાનસભા બેઠક કોંગ્રેસના ઉમેદવાર ધીરૂ ભીલે મતદાન કર્યું છે. આજે સવારે ધીરુભાઈ ભીલ 102 વર્ષનાં માતાના ચરણ સ્પર્શ કરીને આશીર્વાદ લઈ મતદાન કરવા પહોંચ્યા હતા. આ દરમ્યાન ધીરુભાઈ ભીલે જણાવ્યું હતું કે, સંખેડા સહિત સમગ્ર ગુજરાતમાં પરિવર્તન આવશે. મહત્વનું છે કે, ધીરુભાઈ ભીલે પોતાના ગામ કેસપુરામાં મતદાન કર્યું હતું.
આણંદ સાંસદ મિતેષ પટેલે કર્યું મતદાન
આ તરફ આજે આણંદ સાંસદ મિતેષ પટેલે મતદાન કર્યું છે. આજે સવારે તેઓ ઢોલ નગારા સાથે સહ પરિવાર મતદાન મથક પહોંચ્યા હતા . જ્યાં વાસદની સરદાર પટેલ વિનય મંદિર શાળામાં મતદાન કર્યું હતું. આ સાથે લોકશાહીના પર્વમાં જંગી મતદાન કરવા અપીલ પણ કરી હતી.
ભરતસિંહ સોલંકીએ મત આપી મતદાન કરવા અપીલ કરી
આણંદમાં કોંગ્રેસના દિગ્ગજ નેતા ભરતસિંહ સોલંકીએ મતદાન કર્યું હતું. આજે સવારે દેદરડા ગામના સ્થાનિકો સાથે રહી મતદાન કર્યું. આ દરમ્યાન ગામ લોકો દ્વારા ફૂલહાર પહેરાવીને ભરતસિંહનું સ્વાગત કરવામાં આવ્યું હતું. આ દરમ્યાન ભરતસિંહ સોલંકીએ વધુને વધુ મતદાન કરવા માટે કરી અપીલ કરી છે.
વડાપ્રધાન નરેન્દ્ર મોદીએ રાણીપમાં મતદાન કર્યું હતું. મહત્વનું છે કે, વડાપ્રધાન નરેન્દ્ર મોદી જ્યારે વોટ આપવા પહોંચ્યા ત્યારે બુથની બહાર હજારોની સંખ્યામાં ભીડ ઉમટી પડી હતી. વડાપ્રધાન નરેન્દ્ર મોદીએ લાઇનમાં ઊભા રહી છે મત આપ્યો હતો. આ દરમ્યાન વડાપ્રધાન નરેન્દ્ર મોદીએ લોકોનું અભિવાદન કર્યું હતું.
મહત્વનું છે કે, આજે મધ્ય ગુજરાત અને ઉત્તર ગુજરાતની 93 બેઠકો પર સવારના 8 વાગ્યાથી મતદાન પ્રક્રિયા શરૂ થઈ ગઈ છે. રાજ્યના 14 જિલ્લાના 26 હજાર 409 મતદાન મથકો પર મતદાન શરૂ થયું છે. જેમાં 8,533 શહેરી મતદાન મથકો અને 17 હજાર 876 ગ્રામ્ય વિસ્તારના મતદાન મથકોનો સમાવેશ થાય છે. આજે 14 જિલ્લાના 2 કરોડ 51 લાખ 58 હજાર 730 મતદારો પોતાના મત્તાધિકારનો ઉપયોગ કરશે. બીજા તબક્કાની 93 બેઠકો પર કુલ 833 ઉમેદવારો મેદાનમાં છે. બીજા તબક્કામાં મુખ્યમંત્રી, 8 મંત્રી અને 60 સિટીંગ ધારાસભ્યો સહિત ભાજપ, કોંગ્રેસ-NCP અને આપના 279 ઉમેદવારો સહિત કુલ 833 ઉમેદવારોનું ભાવિ EVMમાં સીલ થશે. આગામી 8મી ડિસેમ્બરના રોજ મતગણતરી હાથ ધરવામાં આવશે.