જ્યારે સુરતની 10 વર્ષની છોકરીએ પીએમ મોદીને કહ્યું જેવા સાથે તેવા થવામાં વાંધો નથી

પુલવામામાં સીઆરપીએફના કાફલા પર થયેલા આતંકી હુમલા બાદ સમગ્ર દેશમાં આંતકીઓ અને તેમના આશ્રિતો સામે રોષ શમવાનું નામ નથી લઈ રહ્યો. આ ઘટના બાદ સમગ્ર દેશના અબાલ-વૃદ્ધ સૌ કોઈમાં ભભૂકી ઉઠેલો રોષ કોઈને કોઈ રીતે વ્યક્ત થતો રહ્યો છે. ત્યારે સુરતની દસ વર્ષની એક વિદ્યાર્થિનીએ પણ પ્રધાનમંત્રી મોદીને પત્ર લખીને શહીદોની શહીદીનો બદલો લેવા અપીલ કરી છે. પત્રમાં આ દેશની નાનકડી દીકરીએ ભગવદ ગીતાનો શ્લોક ટાંકીને મોટી વાત કરતાં લખ્યુ છે 'જેવા સાથે તેવા થવામાં વાંધો નથી'. કોણ છે આ દીકરી અને  કેવી રીતે કહી છે પીએમને વાત જોઈએ આ અહેવાલમાં. 

પુલવામામાં જવાનો પર આતંકી હુમલા બાદ સમગ્ર દેશ એક તરફ ઊંડા શોકમાં ગરકાવ છે તો બીજી તરફ દરેક દેશવાસીઓમાં ઊંડે ઊંડે બદલો લેવાની ભાવના ભભૂકી રહી છે. જેમાં દેશનો કોઈ નાગરિક બાકી નથી. શાળાની  પાટલી પર બેઠેલા બાળકોમાં પણ એજ દેશદાઝ ભભૂકી રહી છે જે સરહદ પર જવાનોમાં સળગી રહી છે. બસ ફર્ક માત્ર ઊંમર અને પહોંચનો છે. સુરતની વન્ડરફૂલ એકેડેમી સ્કૂલમાં અભ્યાસ કરતી એક 10 વર્ષની બાળાની અંદર પણ દેશદાઝ સળગી રહી છે. 

14 ફેબ્રુઆરીના રોજ જ્યારે ઘટના બની ત્યારે તે તેના પિતા સાથે આ ટીવી જોઇ રહી ત્યારે સૈનિકોની શહાદત અને આતંકીઓ દ્વારા કરવામાં આવેલી બર્બરતાને જોઇ તેનું હૃદય દ્રવી ઉઠ્યુ હતું અને તેણે સર્વપ્રથમ તો પીએમ સાથે વાત કરવાની ઈચ્છા વ્યક્ત કરી  પરંતુ તેના માતા દ્વારા તેને સમજાવવામાં આવી કે પીએમ સાથે ફોન પર વાત ન કરી શકાય. પછી તેણે પીએમને પત્ર લખીને પોતાની લાગણી જણાવાનું નક્કી કર્યું. તેણી દ્વારા પીએમને પત્ર લખવાની શરૂઆાત કરી અને પત્ર પણ લખ્યો હતો. પત્ર લખ્યા બાદ પીએમઓનું એડ્રેસ પણ તેણીએ ગુગલ ઉપર સર્ચ કરી મેળવ્યુ હતું કેમ કે કોઈ પણ હિસાબે પીએમ સાથે પોતાના મનની વાત અને દેશની દાઝ પહોંચાડવી જ હતી અને આ દેશદાઝ પત્ર પર શબ્દ બની ટપકી. 



સુરતની 10 વર્ષીય બાળકી મનાલી દ્વારા પીએમ નરેદ્ર મોદીને એક પત્ર લખ્યો છે અને પુલવામા આતંકી હુમલામાં જે જવાબદારો છે તેની સામે પગલા જેમ બને તેમ જલદી પગલાં ભરવા અપીલ કરી છે. સાથે સાથે ગીતાનું એક સૂત્ર ટાંકીને જણાવ્યું છે કે જેવા સાથે તેવા થવામાં કોઇ વાંધો નથી. તેથી પુલવામામાં આતંકી હુમલાના માસ્ટરમાઇન્ડને સબક શીખવવા જરૂરી છે. મનાલીએ લખેલા પત્રને શબ્દશ જોઈએ તો તેણી પ્રધાનમંત્રીને લખે છે કે 'શ્રી મોદી અંકલ મેરી ખ્વાહિશ હૈ કી આપ પાકિસ્તાન કો મુંહતોડ જબાબ દેના ઔર મુઝે આપ પર પૂરા ભરોસા હૈં આપ જો કરેંગે અચ્છા હી કરેંગે. અબ આપ હી હમારી ખ્વાહિશ હૈ. એક એક આતંકવાદી કો માર ગિરાના. ગીતા કે સાર મેં ભી લિખા હૈં કી જૈસે કે સાથ તૈસા હોના કોઈ પાપ નહીં હૈ. ઔર પત્થરબાજોં કો સીધા કરકે હી છોડના મૈરા નામ મનાલી હૈં. મૈં ચોથી કક્ષા મેં પઢતી હૂં. મૈં દસ સાલ કી હૂં. મૈં ગુજરાત કે સુરત કે પૂનાગાંવ રોડ શિવમ કોમ્પલેક્ષમે રહેતી હૂં... થેંક્યૂ આપ મેરા પત્ર જરૂર પઢેંગે મૈંમ્મીદ કરતી હૂં'. 

દેશ પર થયેલા આતંકી હુમલા સામે દેશમાં કેટલો આક્રોશ છે તેનો માપદંડ નાનકડી બાળાએ પીએમને લખેલા પત્ર પરથી આંકી શકાય છે. વડીલો જ નહી યુવાનો જ નહી પરંતુ આ દેશનું એક એક બાળક પણ દેશના દુશ્મનો સામે બદલાની ભાવના ઝંખી રહ્યું છે. કદાચ દેશદાઝની આ જ ભાવના દેશને અડીખમ બનાવી રાખે છે. બાકી યુદ્ધ એ જ કલ્યાણ હશે તો વધારે રાહ જોવી નહી પડે.