અરવલ્લી / આધારકાર્ડ માંગ્યું તો કુહાડી લઇને દોડ્યો : માલપુરમાં તપાસ માટે ગયેલો પોલીસ કોન્સ્ટેબલ માંડ માંડ બચ્યો

• અરવલ્લીના માલપુરમાં પોલીસ કોન્સ્ટેબલ પર હુમલો
• અણિયોપના ફતેપુરા ગામે કરાયો હુમલો
• આરોપીની અરજીની તપાસ માટે ગઇ હતી પોલીસ

અરવલ્લીના માલપુર પોલીસ સ્ટેશનના કોન્સ્ટેબલ પર હુમલાની ઘટના સામે આવતા હડકંપ મચી ગયો છે. આરોપી વિરુદ્ધ અરજી કરવામાં આવતા પોલીસ હકીકતની સત્યતા તપાસવા માટે ગઇ હતી આ દરમિયાન આરોપીઑએ અણિયોપના ફતેપુરા ગામે કોન્સ્ટેબલ પર હુમલો કર્યો હતો. જેને લઈને સમગ્ર વિસ્તારમાં સન્નાટો છવાયો છે. આ ઘટના બાદ પોલીસે એક આરોપીને દબોચી લીધો હતો. 

આધાર કાર્ડ માંગતા કુહાડી લઇ દોડ્યો આરોપી
અણિયોપના ફતેપુરા ગામે કેસમાં તપાસ અર્થે ગયેલી પોલીસ પર હુમલાની ઘટના સામે આવી છે. આરોપી ટોળા દ્વારા કોન્સ્ટેબલ પર હુમલો કરાયો હતો. આરોપી વિરૂદ્ધ કરવામાં આવેલી અરજીની તપાસ માટે પોલીસ ગઇ હતી જ્યાં પોલીસ કામર્ચારીએ આરોપી પાસે ચકાસણી માટે આધાર કાર્ડની માંગણી કરી હતી. જેમાં પિત્તો ગુમાવી બેઠેલો આરોપી ગુસ્સે થઇ કોન્સ્ટેબલ પાછળ કુહાડી લઇ દોડ્યો હતો. જો કે આ ઘટનામાં સાથી કર્મચારીઑએ હુમલાખોર આરોપીને પકડી લઈ કોન્સ્ટેબલને બચાલી લીધો હતો.

પોલીસે એક આરોપીની કરી અટકાયત
આ બનાવને લઇને સમગ્ર પંથકમાં ઉહાપોહ સર્જાયો હતો. ત્યારબાદ સમગ્ર ઘટનામાં પોલીસે આકરી કાર્યવાહી કરી માથાભારે આરોપીની અટકાયત કરી લીધી હતી. જ્યારે આ પ્રકરણમાં સંડોવાયેલ અન્ય 3 આરોપીઓ પોલીસને હાથતાળી આપી નાશી છૂટવામાં સફળ રહ્યા હતા. જેને પગલે પોલીસે તમામ ફરાર આરોપીને ઝડપી પાડવા તપાસના ચક્રો ગતિમાન કર્યા છે.મહત્વનું છે કે એકાદ માસ અગાઉ આવો જે એક કિસ્સો વડોદરામાં સામે આવ્યો હતો. જેમાં  રાવપુરા પોલીસ સ્ટેશનના રાયોટિંગના ગુનામાં સંડોવાયેલા આરોપીઓને પકડવા માટે ગયેલા પોલીસ જવાનો પર  હુમલો કરવામાં આવ્યો હતો. પોલીસને ઘેરી લઈ ટોળુ આરોપીઓને ભગાડી ગયું હતું.જે બનાવના પગલે પોલીસનો કાફલો દોડી આવ્યો હતો.