લોકડાઉનના કારણે અત્યારે દુનિયાભરમાં વીડિયો કોન્ફરન્સની બોલબાલા વધી છે.લોકોમાં ઝુમ,ગુગલ ડ્યો,ગુગલ મીટ,વેબેક્સ સહિતની એપ ખાસ્સી પોપ્યુલર છે.શહેરની અનેક સ્કુલો દ્વારા પણ વીડિયો કોન્ફરન્સથી ભણાવવાનું શરુ કરાયું છે. ફેસબુકની માલિકીની ઇન્સ્ટન્ટ મેસેજિંગ એપ્લિકેશન વોટસએપે ગ્રુપ વીડિયો કોલિંગના પાર્ટિસિપન્સની સંખ્યા વધારવા માટે થોડા દિવસો પહેલા જાહેરાત કરી હતી.
વોટ્સએપમાં હવે એક સાથે આઠ લોકો વીડિયો કોન્ફરન્સમાં જોડાઇ શકશે
આ ફિચર ઓડિયો અને વીડિયો કોલ્સ એમ બંને માટે છે
વોટ્સએપે હવે કહ્યું છે કે મેસેંજરના ગ્રુપમાં હવે એક સાથે આઠ લોકો વીડિયો કોલિંગ કરી શકશે. અત્યાર સુધી એકસાથે ફક્ત ચાર લોકો વીડિયો કોલિંગ કરી શકતા હતા. જોકે વોટ્સએપનું નવું અપડેટ હજુ બધા યુઝર્સ સુધી પહોંચ્યું નથી. પરંતુ તબક્કાવાર અપડેટ બધાને મળી જશે. આ ફિચર ઓડિયો અને વીડિયો કોલ્સ એમ બંને માટે છે.
ફેસબુકે તેની જાણકારી ટ્વીટ કરીને આપી છે. અગાઉ આ સુવિધા એન્ડ્રોઇડ અને આઇફોનના બીટા વર્ઝન પર જોવા મળી હતી. એક સાથે આઠ લોકોની વીડિયો કોલિંગ અપડેટ થયા બાદ વોટ્સએપની સ્પર્ધા imo જેવી એપ સાથે થશે. imo એપ્લિકેશનમાં એકસાથે નવ લોકો વીડિયો કોલ્સ કરી શકે છે. અગાઉ ફેસબુકના CEO માર્ક ઝકરબર્ગે મેસેંજરમાં રૂમ ફિચરની જાહેરાત કરતાં જણાવ્યું હતું કે, દરરોજ 70 કરોડ લોકો કોલિંગ માટે વોટ્સએપ અને ફેસબુક મેસેન્જરનો ઉપયોગ કરી શકે છે.
આ પહેલા ફેસબુક મેસેંજરમાં રૂમ ફિચર લોન્ચ કર્યું હતું. જેની મદદથી 50 લોકો એક સાથે વીડિયો કોલિંગ કરી શકે છે. ખાસ વાત એ છે કે જે લોકો ફેસબુકનો ઉપયોગ કરતા નથી તે પણ ફેસબુક મેસેન્જર રૂમના વીડિયો કોલિંગમાં જોડાઇ શકે છે. મેસેંજર રૂમ કોલિંગમાં જોડાવા માટે એક ઇન્વાઇટ લિંકની જરુર હોય છે. ફેસબુકએ મેસેંજરમાં રૂમ ફીચર આપીને ઝૂમ વીડિયો કોન્ફરન્સિંગ એપ્લિકેશનને પડકાર ફેંક્યો છે.