બધા યૂઝર્સને પેમેન્ટ સેવા આપવા RBIની મંજૂરી માગતું WhatsApp

વોટ્સ એપના પ્રમુખ ક્રિસ ડેનિયલે પોતાના તમામ ભારતીય યુઝર્સને પેમેન્ટ સેવા મળી રહે તે માટે ઔપચારિક મંજૂરી માગી છે. ક્રિસ ડેનિયલે ભારતીય રિઝર્વ બેંકને પત્ર લખીને આ મંજૂરી માગી છે.

ઉલ્લેખનીય છે કે દેશમાં વોટ્સ એપના કુલ 20 કરોડ યુઝર્સ છે. બીજી તરફ વોટ્સ એપમાં અફવા ફેલાવતા સંદેશ મુદ્દે સરકાર દ્વારા આલોચના કરવામાં આવી રહી છે. મેસેજિંગ એપ વોટ્સ એપે પોતાના લગભગ દસ લાખ યુઝર્સ સાથે પેમેન્ટની સેવા શરૂ કરી હતી.

જો કે આ સેવા શરૂ થયાના અનેક મહિના વીત્યા બાદ પણ મંજૂરી મળી નથી. લોકપ્રિય એપ લગભગ બે વર્ષથી પેમેન્ટની સેવા માટેની યોજનાને લઈને સરકારના સંપર્કમાં છે. તો બીજી તરફ પ્રતિ સ્પર્ધી કંપની ગૂગૂલ પણ પોતાની પેમેન્ટ સેવાને આગળ વધારી ચૂકી છે.

વોટ્સ એપ વર્તમાન સમયમાં પ્રાયોગિક આધાર પર પેમેન્ટ સેવાનું સંચાલન કરી રહ્યું છે. ત્યારે કંપનીના પ્રમુખ ક્રિસ ડેનિયલે ભારતીય રિઝર્વ બેંકને પત્ર લખીને દેશમાં તમામ યુઝર્સને પેમેન્ટ સેવા માટે ઔપચારિક અનુમતિ આપવા આગ્રહ કર્યો છે.

ક્રિસ ડેનિયલે ભારતીય રિઝર્વ બેંકને પત્ર લખીને કહ્યું છે કે હું તમારી પાસે વોટ્સ અપની ભીમ યુપીઆઈ પર ચાલનારી પેમેન્ટ પ્રોડક્ટને તમામ ભારતીય યુઝર્સ માટે તત્કાલિક શરૂ કરવા માટે ઔપચારિક અનુમતિ આપવા માટે આગ્રહ કરુ છું.

સાથો સાથ અમને ડીજીટલ સશક્તિકરણ અને નાણાકીય સમાવેશ દ્વારા ભારતીય લોકોનાં જીવનને વધુ સારૂ બનાવવા અને ઉપયોગી તથા સુરક્ષિત સેવા રજૂ કરવા માટે તક આપવામાં આવે.