મહામારી / હવે કોરોના શું કરશે? 68 ટકા લોકોએ તો મેળવી લીધું 'વાયરસ વિરોધી હથિયાર', સીરો સર્વેથી મળી આ મોટી રાહત

• ICMR દ્વારા કરાયેલા ચોથા સીરો સર્વેના પરિણામો જાહેર કરાયા
• 28,975 લોકો પર કરાયેલા સર્વેના તારણો બહાર પડાયા
• 67.6 ટકા લોકોએ એન્ટીબોડી મેળવી લીધી
• 6 થી 17 વર્ષના બાળકોએ પણ એન્ટીબોડી મેળવી લીધી 

ICMR  દ્વારા જુન-જુલાઈની વચ્ચે 28,975 લોકો પર સર્વે કરાયો 
ICMR  દ્વારા જુન-જુલાઈની વચ્ચે 28,975 લોકો પર સર્વે કર્યો હતો, સર્વેમાં 6 થી 17 વર્ષના બાળકોને પણ સામેલ કરાયા હતા. તેમાં 6 થી 9 વર્ષના 2892 બાળકો, 10 થી 17 વર્ષના 5, 799 બાળકો તથા 18 વર્ષથી ઉપરના 20, 284 લોકોએ ભાગ લીધો હતો. 

હજુ પણ 40 કરોડ લોકો પર કોરોનાનો ખતરો- ICMR 
સીરો સર્વેના પરિણાણો જાહેર કરતા ICMR ના ડીજી ડોક્ટર બલરામ ભાર્ગવે જણાવ્યું કે સર્વેમાં સામે આવ્યું છે કે દેશની બે-તૃતિયાંશ વસતીમાં કોવિડ એન્ટીબોડી મળી છે અને હજુ પણ 40 કરોડ લોકો પર કોરોનાનો ખતરો છે. સર્વેમાં સામેલ 6 થી 17 વર્ષના અડધાથી વધારે બાળકોમાં પણ એન્ટીબોડી જોવા મળી છે. તેનો અર્થ એવો થયો કે બીજી લહેરમાં સંક્રમણે બાળકોને પણ પ્રભાવિત કર્યાં છે. 

સર્વેમાં આ તથ્યો સામે આવ્યાં
-  6 થી 9 વર્ષના 57.2 ટકા અને 10 થી 17 વર્ષના 61.6 ટકા બાળકોમાં એન્ટીબોડી જોવા મળી.
- 18 થી 44 વર્ષના 66.7 ટકા, 45 થી 60 વર્ષના 77.6 ટકા અને 60 થી વધારે વયના 76.7 ટકા લોકોમાં એન્ટીબોડી જોવા મળી.
- સર્વેમાં સામેલ 69.2 ટકા મહિલાઓ તથા 65.8 ટકા પુરુષોમાં કોવિડની સામે એન્ટીબોડી મળી.
- શહેર વિસ્તારોમાં રહેનાર 69.6 ટકા અને ગ્રામીણ વિસ્તારોમા રહેતા 66.7 ટકા લોકોમાં એન્ટીબોડી જોવા મળી. 

વેક્સિને અસર દેખાડી
આ સર્વેમાં સામેલ 12, 607 લોકો એવા હતા જેમણે વેક્સિન લીધી નહોતી, 5,038 લોકોએ વેક્સિનનો એક ડોઝ લીધો હતો જ્યારે વેક્સિનની બન્ને ડોઝ લેનાર લોકોમાં 89.8 ટકા એન્ટીબોડી જોવા મળી હતી.