દિલ્હી વિધાનસભાની ચૂંટણી માટે આજે મતદાન યોજાશે. 70 બેઠકો પર સવારે 8 વાગ્યાથી મતદાન શરૂ થશે અને સાંજે 6 વાગ્યા સુધી ચાલશે. દિલ્હીના 1 કરોડ 47 લાખથી વધુ મતદારો મત આપશે. લોકસભા ચૂંટણી બાદ 4 લાખ 69 હજાર 929 મતદારો વધ્યા છે. ત્યારે આ મતદાન માટે 13 હજાર 750 બુથ તૈયાર કરાયા છે. જેમાં 70 આદર્શ મતદાન કેન્દ્રનો સમાવેશ થાય છે.
આજે દિલ્હી વિધાનસભાનું મતદાન થશે
70 બેઠકો પર થશે મતદાન
દિલ્હીમાં 1.47 કરોડ લોકો કરશે મતદાન
વિધાનસભા બેઠક દીઠ એક આદર્શ મતદાન કેન્દ્રનું આયોજન કરાયું છે. દરેક જિલ્લામાં દિવ્યાંગો માટે અલગ બૂથની વ્યવસ્થા કરાઈ છે. મતદાનને લઈને સઘન સુરક્ષા વ્યવસ્થા પણ કરવામાં આવી છે. સંવેદનશીલ 3 હજાર 841 બુથ પર ચૂસ્ત પોલીસ બંદોબસ્ત ગોઠવવામાં આવ્યો છે. તેમજ સુરક્ષા માટે અર્ધસૈનિક દળની 190 કંપનીઓ તૈનાત કરાઈ છે તો 3 હજાર 800 પોલીસકર્મીઓ અને 19 હજાર હોમગાર્ડને પણ તૈનાત કરાયા છે.
આ ચૂંટણીમાં ભાજપ અને આપ પાર્ટી વચ્ચે સીધી ટક્કર છે. આપ અને ભાજપે છેલ્લી ઘડી સુધી મતદારોને રીઝવવાના પ્રયાસો કર્યા છે. બંનેએ આ વખતે પ્રચારમાં પૂરી તાકાત લગાવી છે. આ વખતની ચૂંટણીમાં વિકાસને ઓછું પ્રાધાન્ય આપવામાં આવ્યું છે. ભાજપે શાહીનબાગનો વ્યાપક પ્રમાણમાં ઉલ્લેખ કર્યો છે. તો AAPનું ફોકસ કેજરીવાલની મફત યોજનાઓ પર રહ્યું છે. જ્યારે કોંગ્રેસે દેશના અર્થતંત્રની સ્થિતિ અને રોજગારીની વાત પર ભાર મૂક્યો છે.