આજે સ્થૂળતા એ મોટા ભાગના લોકોની મુશ્કેલીભરી સમસ્યા બની ગઇ છે. આવામાં દરેક વ્યક્તિ ઝડપથી પોતાનું વજન ઘટાડવા ઇચ્છતી હોય છે, પરંતુ આ કામ એટલું સરળ નથી. વજન ઘટાડવા માટે એક સંપૂર્ણ કાર્યપ્રણાલીમાંથી પસાર થવું પડે છે, જેની મદદથી તમે ફિટ રહેવાની સાથે તમારું વજન પણ ઓછું કરી શકો છો.
વજન કંટ્રોલ કરો આસાન રીતે
વ્યાયામ કે ડાયટિંગ શું છે અસરદાર
ડાયટિંગ વજન ઓછું કરવાનો કોઇ યોગ્ય રસ્તો નથી પણ વ્યાયામને જીવનશૈલીમાં સામેલ કરવો એ જ પરફેક્ટ છે. આ બે વસ્તુ જો સાથે હશે તો જ વજન ઘટી શકશે.
• જો તમે તમારું વજન કંટ્રોલ કરવા માગો છો તો ડાયટિંગ નહીં, પરંતુ સંપૂર્ણ આહાર અને વ્યાયામ બંને જરૂરી છે.
• જો તમે સતત વ્યાયામ કરો છો અને ભોજન કંટ્રોલ નથી કરતા તો તમારી એક્સ્ટ્રા કેલરી તો તમે બર્ન કરી શકશો પણ વજન ઓછું નહીં થાય.
• જમવા પર કંટ્રોલ કરવાની સાથે એક્સર્સાઇઝ પણ કરશો તો ઝડપથી વજન ઘટશે.
• જો તમે માત્ર ડાયટિંગ કરો છો તો એની અસર થોડા દિવસોમાં તમારા શરીર પર દેખાશે. તમે નિશ્ચિતપણે પાતળા થઇ જશો પણ જમવાનું ચાલુ કરશો એટલે થોડા દિવસોમાં જ ફરી પહેલાં જેવા જાડા થઇ જશો.
• જો તમે લાંબા સમય સુધી ફિટ રહેવા ઇચ્છો છો તો તમારે તમારા ભોજનને સંતુલિત કરવાની સાથે વ્યાયામને પણ તમારી દિનચર્યામાં સામેલ કરવો પડશે.
• સામાન્ય રીતે માત્ર ડાયટિંગ કરનારા લોકો વજન ઓછું કરવાના ચક્કરમાં પોતાની માંસપેશીઓને નબળી બનાવી દે છે, જેનાથી શારીરિક નબળાઇ આવવા લાગે છે. ધીમે-ધીમે બીમારીઓ વધવા માંડે છે.
• ભોજન કંટ્રોલ કરવા ચરબીવાળી વસ્તુઓ કાઢી અનાજ, દાળ, ફણગાવેલા ખાદ્ય પદાર્થો, ફળ, લીલાં શાકભાજી વગેરેનું સેવન કરવું જોઇએ.