ગુજરાતની મહિલા હેલ્પલાઈન અભયમ્ 181માં એક વિચિત્ર કિસ્સો સામે આવ્યો છે. સમસ્યા એવી કે મહિલા હેલ્પલાઈનનાં કાઉન્સેલર કઈ સ્ત્રીને ન્યાય અપાવે તેની અસમંજસમાં મુકાયાં હતાં. અંતે કેસમાં સમાધાન તો થયું પણ એવું તો શું બન્યું કે પત્ની પતિને શનિ-રવિ તેની પ્રેમીકા સાથે રહેવા મોકલવાં તૈયાર થઇ ગઇ.
મોટી બહેનનાં લગ્નજીવનના ભંગાણથી પિયર ગયેલી મહિલાનાં લગ્નજીવનમાં ભંગાણ પડ્યું
પતિ સોમથી શુક્ર પત્ની સાથે રહે છે અને શનિ- રવિ પ્રેમીકા સાથે...
એક લગ્નજીવન બચાવવાં ગયેલી હેલ્પલાઈને બે લગ્નજીવન બચાવ્યાં
હિંમતનગરનાં એક ગામમાં રહેતાં બે સગા ભાઇ પીન્ટુ અને હરેશનાં લગ્ન 14 વર્ષ પહેલાં તેમની જ્ઞાતિની હેપ્પી અને મીના નામની બે સગી બહેનો સાથે થયાં હતાં. મોટા ભાઇ પીન્ટુ અને હેપ્પીનાં લગ્નજીવનમાં ભંગાણ પડતાં તે પિયર ચાલી ગઇ હતી. જેને કારણે પિયરીયાએ બીજી દીકરી મીનાને પણ તેનાં 4 બાળકો સાથે પિયર બોલાવી લીધી હતી. છેલ્લા 5 વર્ષથી બન્ને બહેનો પિયરમાં જ રહેતી હતી.
પરણીત હરેશ પ્રેમીકા સાથે લિવઇનમાં રહેવાં લાગ્યો
હરેશ(36) અને મીના(34)એ તેમનાં માતા પિતાને સમજાવ્યાં કે અમારા લગ્નજીવનમાં કોઇ સમસ્યા નથી તો પછી અમને તો સાથે રહેવા દો. જો કે માતા-પિતા તે માનવા તૈયાર નહોતા. આ દરમિયાન 5 વર્ષ પહેલાં જ હરેશ તેનાં કામનાં સ્થળે કામ કરતી તેનાંથી 4 વર્ષ મોટી ક્રિષ્નાનાં પ્રેમમાં પડ્યો હતો. 3 વર્ષથી ક્રિષ્ના લિવઇન રિલેશનશીપનાં કરાર કરીને હરેશનાં ઘરે જ રહેતી હતી.
પતિએ કહ્યું તું અમને નથી જોઇતી
આ વાતની જાણ મીનાને થતાં મીનાએ હરેશને સમજાવવાનો અને સાસરે પાછાં આવવાનો પ્રયાસ કર્યો. જોકે હરેશ તથા તેની માતાએ મીનાને કહી દીધું કે 'તું અમને નથી જોઈતી. અમે ક્રિષ્નાને જ રાખીશું'. જેથી અંતે કંટાળેલી મીનાએ મહિલા હેલ્પલાઇન 181ની મદદ માંગતાં હેલ્પલાઇનનાં કાઉન્સેલર નિલમ બહેન ત્યાં પહોંચ્યા હતાં.
હેલ્પલાઇનનાં કાઉન્સેલરે આખો દિવસ કાઉન્સેલિંગ કર્યું
સમગ્ર ઘટનાં સાંભળી તેઓ અસમંજસમાં મુકાયાં હતાં. તેમણે પહેલાં ક્રિષ્નાને સમજાવી હતી કે તમારી પાસે આખી જીંદગી પડી છે. તમે આ સંબંધનો અંત લાવી બીજે લગ્ન કરી શકો છો. જોકે તે માની નહોતી. બીજી તરફ હરેશએ મીનાને કહ્યું હતું કે હું ક્રિષ્નાને જ રાખીશ તને નહીં રાખું. જેથી 181નાં કાઉન્સેલરે હરેશ, તેની વિધવા માતા સહિતનાં પરિવારજનોનું એક આખો દિવસ કાઉન્સેલિંગ કર્યું હતું.
પતિએ શરત મુકી, રાખીશ તો પત્ની અને પ્રેમીકા બન્નેને
કાઉન્સેલિંગ બાદ હરેશએ કહ્યું હતું કે હું રાખીશ તો બન્નેને રાખીશ અને બન્નેને એક ઘરમાં નહીં રાખું. તેની આ વાત સાથે મીના અને ક્રિષ્ના બન્ને સહમત થયાં હતાં. અંતે નક્કી કરાયું કે હરેશ સોમથી શુક્ર પત્ની મીના અને બાળકો સાથે અમદાવાદ રહેશે. જ્યારે આટલા દિવસ પ્રેમીકા ક્રિષ્ના હરેશની વિધવા માતા સાથે વતનમાં રહેશે. તેમજ દર શનિ- રવિ હરેશ વતનમાં ક્રિષ્ના સાથે રહેવા આવશે.
5 વર્ષ જુની સમસ્યાનો ઉકેલ આવ્યો
આ દરમિયાન છેલ્લાં 5 વર્ષથી કેટલીક સમસ્યાને કારણે અલગ થયેલાં પીન્ટુ અને હેપ્પીનું પણ મહિલા હેલ્પલાઈને કાઉન્સેલિંગ કર્યું હતું. અંતે તેમને પણ ભૂલ સમજાતાં બન્ને જણાંએ પણ સાથે રહેવાનું નક્કી કર્યું હતું. આ દંપતી વતનમાં જ સાથે રહેશે.