સ્પોર્ટ્સ / જે થયું એ થયું...: CSKમાં કેપ્ટનશીપ વિવાદ મામલે પહેલીવાર જાડેજાએ તોડ્યું મૌન 

• કેપ્ટનશીપ વિવાદ મામલે પહેલીવાર જાડેજાએ તોડ્યું મૌન 
• જાડેજાએ કહ્યું કે, તે આ ઘટનાથી આગળ વધી ગયો છે 
• મારુ સંપૂર્ણ ધ્યાન ભારત માટે રમવા અને સારું પ્રદર્શન કરવા પર હતું: જાડેજા 

ઈન્ડિયન પ્રીમિયર લીગ IPLની 15મી સિઝન ટીમ ઈન્ડિયાના ઓલરાઉન્ડર રવિન્દ્ર જાડેજા માટે ઘણી નિરાશાજનક રહી હતી. આ તરફ હવે IPLમાં કેપ્ટનશિપના વિવાદને લઈને જાડેજાએ મોટી વાત કહી છે. IPL 2022ની શરૂઆત પહેલા ચેન્નાઈ સુપર કિંગ્સ (CSK)એ રવિન્દ્ર જાડેજાને કેપ્ટન બનાવ્યો કારણ કે, ધોનીએ કેપ્ટન્સી છોડવાનો નિર્ણય લીધો હતો. પરંતુ જાડેજા કેપ્ટનશિપમાં શાનદાર પ્રદર્શન કરી શક્યો ન હતો. જેની એમએસ ધોનીએ ફરીથી કેપ્ટનશિપની જવાબદારી સંભાળી હતી. બાદમાં જાડેજા ઈજાના કારણે બાકીની મેચમાંથી બહાર થઈ ગયો હતો.

IPLમાં કેપ્ટનશિપના વિવાદને લઈને જાડેજાએ મોટી વાત કહી છે. એજબેસ્ટન ખાતે ઈંગ્લેન્ડ સામેની પાંચમી ટેસ્ટના બીજા દિવસની સમાપ્તિ બાદ પ્રેસ કોન્ફરન્સમાં બોલતા જાડેજાએ કહ્યું કે, તે આ ઘટનાથી આગળ વધી ગયો છે. હવે તેનું સંપૂર્ણ ધ્યાન ભારત માટે રમવા અને સારું પ્રદર્શન કરવા પર હતું.

શુ કહ્યું રવિન્દ્ર જાડેજાએ ? 

રવિન્દ્ર જાડેજાએ કહ્યું, 'જે થયું તે થયું. આઈપીએલ મારા મગજમાં નહોતું. જ્યારે પણ તમે ભારત માટે રમો છો, ત્યારે તમારું સંપૂર્ણ ધ્યાન ભારતીય ટીમ પર હોવું જોઈએ. મારા માટે પણ એવું જ હતું. ભારત માટે સારું કરવા કરતાં વધુ સારો કોઈ સંતોષ નથી. જાડેજાએ વધુમાં કહ્યું, 'ભારતની બહાર ખાસ કરીને ઈંગ્લેન્ડમાં સારું પ્રદર્શન કરવું ખરેખર સારું લાગે છે. એક ખેલાડી તરીકે 100 રન બનાવવા એ મોટી વાત છે. હું ખરેખર એક ખેલાડી તરીકે મારી જાતમાં થોડો વિશ્વાસ રાખી શકું છું. 

જાડેજાએ બુમરાહ ભરપેટ વખાણ કર્યા 

રવિન્દ્ર જાડેજાએ વધુમાં કહ્યું, જ્યારે પણ બુમરાહ નેટ્સ પર બેટિંગ કરે છે, ત્યારે તે તેને ગંભીરતાથી લે છે. અમારા 9માં, 10માં અને 11માં ક્રમના ખેલાડીઓ બેટિંગમાં ખૂબ પ્રેક્ટિસ કરે છે. અમારું ટીમ મેનેજમેન્ટ સુનિશ્ચિત કરે છે કે, તેઓ પ્રેક્ટિસ સેશનમાં તેમની બેટિંગ પર કામ કરે છે. જ્યારે 9મા, 10મા અને 11મા ક્રમના બેટ્સમેન રન બનાવે છે, ત્યારે તે સારું લાગે છે કારણ કે તે ટીમ માટે બોનસ છે.