Sunday, June 16, 2019
સબસ્ક્રાઈબ કરો VTVGujarati ન્યુઝ Whatsapp

વાયુ / વાવાઝોડા પહેલા, આફત દરમિયાન અને બાદમાં શું કરશો?

વાવાઝોડા પહેલા, આફત દરમિયાન અને બાદમાં શું કરશો?

ગુજરાતના દરિયાકાંઠે વાયુ વાવાઝોડુ ત્રાટકે તેવી સંભાવના છે ત્યારે ગુજરાતના દરિયાકિનારે અલર્ટ જાહેર કરવામાં આવી છે. આ વાવાઝોડામાં કાંઠા વિસ્તારના 292 ગામોને અસર થઇ શકે છે. જ્યારે તેમાં સાડા ત્રણ લાખ વસ્તીને અસર થવાની શક્યતાઓ છે. ત્યારે આ મામલે તંત્ર અલર્ટ છે. પરંતુ તમે વાવાઝોડા પહેલા, વાવાઝોડા દરમિયાન અને વાવાઝોડા બાદ શું કરશો?

ગાંધીનગરમાં મહેસુલ અધિક સચિવ પંકજ કુમારનું નિવેદન

'વાયુ' વાવાઝોડાને લઈને તંત્ર અલર્ટ થયું છે. આ મુદ્દે મહેસુલ અધિક સચિવ પંકજ કુમારે જણાવ્યું કે, વાવાઝોડુ 650 કીમી દૂર છે. 13 તારીખે વહેલી સવારે વાવાઝોડું ગુજરાતમાં પ્રવેશ કરશે. આ વાવાઝોડામાં અમરેલી, જૂનાગઢ, મોરબી, પોરબંદર, કચ્છ પ્રભાવિત થવાના છે.  જેને લઈને તંત્ર સતર્ક થયું છે. જેટી અને કાચા મકાનોનો સર્વે કરવામાં આવ્યો છે. કાચા મકાનમાં રહેતા લોકોનુ સ્થળાંતર કરવાની કામગીરી હાથ ધરવામાં આવી છે.

પંકજ કુમારના જણાવ્યા પ્રમાણે 35 NDRFની ટિમો રાજ્યમાં તહેનાત કરવામાં આવનાર છે. BSFની 2 કંપની કચ્છમાં તહેનાત રહેનાર છે. જ્યારે લોકોને સુરક્ષિત સ્થળો પર ખસેડવામાં આવશે. તમામ જિલ્લામાં એક એક આર્મી ટીમ પણ મોકલવામાં આવશે.

વધુમાં તેમણે કહ્યું કે, 4.5 લાખ જેટલા ખેડૂતોને મેસેજ થકી માહિતી આપીએ છીએ. દરિયામાં ગયેલી તમામ બોટ પરત આવી ગઈ છે. વાવાઝોડા પછીની પરિસ્થિતિને ધ્યાને લઈને તૈયારી કરાઈ છે. ભારેથી અતિ ભારે વરસાદ થવાની શક્યતા છે.

વાવાઝોડા પહેલા શું તૈયારી કરશો ?

  • રહેણાક વિસ્તારને તંત્રએ ખાલી કરવા કહ્યું હોય તો તેનો અમલ કરવો
  • તંત્રએ જો રહેણાક વિસ્તાર ખાલી કરવા ન કહ્યું હોય તો તમારે સાવચેતી રાખવી
  • રહેણાકની મજબૂતીની ખાતરી કરો 
  • કોઈ સમારકામ કરવાની જરૂર પડે તો કરો
  • ચેતવણી તેમજ સમાચારો પર સતત નજર રાખો
  • રેડિયો સેટને ચકાસી લો, તેને ચાલુ હાલતમાં રાખો
  • સ્થાનિક તંત્રના સંપર્કમાં રહેવાનો પ્રયાસ કરો.
  • પશુઓને ખૂંટા સાથે બાંધેલા હોય તો છૂટા કરી રાખો
  • માછીમારોને દરિયામાં જવું નહી, બોટ સલામત સ્થળે લાંગરવી
  • અગરીયાઓએ સલામત જગ્યાએ સ્થળાંતર કરવુ
  • આશ્રય લઈ શકાય તેવા ઊંચા સ્થળો ધ્યાનમાં રાખવા
  • સૂકો નાસ્તો, પાણી, ધાબળા, કપડાં અને પ્રાથમિક સારવારની કિટ સાથે રાખવી
  • અગત્યના ટેલિફોન નંબર સાથે રાખવા

વાવાઝોડા દરમિયાન શું કરશો?

  • જર્જરિત મકાન કે વૃક્ષ નીચે આશ્રય ન લેશો
  • રેડિયો પર સમાચાર સાંભળો અને સૂચનાનો અમલ કરો
  • વાવાઝોડા સમયે ઘર બહાર નીકળવાનું ટાળો
  • વાવાઝોડા દરમિયાન રેલ મુસાફરી કે દરિયાઈ મુસાફરી ટાળો
  • વીજ પ્રવાહ અને ગેસ કનેક્શન બંધ કરી દો
  • દરિયા નજીક, ઝાડ નીચે કે વીજળીના થાંભળા નજીક ઊભા ન રહો
  • અફવા ફેલાતી અટકાવો, આધારભૂત સૂચનોને અનુસરો

વાવાઝોડા બાદ શું કરશો?

  • બચાવ કામગીરી માટે જુદી જુદી ટીમોની મદદ લો
  • ફાયર બ્રિગેડ, પોલીસ, કંટ્રોલરૂમ અને અધિકારીઓની મદદ લેવી
  • અસરગ્રસ્તોની મદદ કરવી, તેમને સલામત સ્થળે ખસેડવા
  • જરૂર પડે તો તબીબી સારવાર તાત્કાલિક મળે તેવી વ્યવસ્થા કરવી
  • હવામાન ખાતા તરફથી મળતી આગાહીઓને અનુસરો
  • અસરગ્રસ્તોને જરૂરી મદદ ઉપલબ્ધ કરાવવી
Vayu Cyclone gujarat Gujarat Cyclone Weather update Vayu Clone Live Updates

જોવા જેવું વધુ જુઓ

બ્રેકિંગ ન્યૂઝ