સાવચેતી / લો! ફરી માસ્ક પહેરવાનું ચાલુ: જુઓ ભારતના કયા રાજ્યમાં કોરોના પર શું નિર્ણય લેવાયા, બૂસ્ટર ડોઝ પર ફોકસ 

• ચીનમાં વધતા કોરોનાને કારણે ભારતમાં પણ ડર પાછો ફર્યો
• PM મોદીએ  રાજ્યોના મુખ્યમંત્રીઓ સાથે બેઠક યોજી 
• દિલ્હી AIIMSમાં અને યુપીમાં ભીડ વાળા સ્થળોએ માસ્ક જરૂરી
• કર્ણાટક, બંગાળ, તમિલનાડુ અને ઝારખંડમાં તંત્ર એલર્ટ

ચીનમાં કોરોનાના વધતા જતા કેસોને કારણે ભારતમાં પણ તેનો ડર પાછો ફર્યો છે. ઓમિક્રોનનું સબ વેરિઅન્ટ BF.7 ચીનમાં પાયમાલ મચાવી રહ્યું છે. હવે ભારત પણ આ અંગે એલર્ટ થઈ ગયું છે. PM મોદીએ ગુરુવારે આ અંગે ઉચ્ચ સ્તરીય બેઠક યોજી હતી. આ સિવાય અનેક રાજ્યોના મુખ્યમંત્રીઓ અને આરોગ્ય મંત્રીઓએ કોવિડ-19 માટેની તૈયારીઓ અને પ્રોટોકોલની સમીક્ષા કરવા બેઠક યોજી હતી. જેમાં ભીડભાડવાળી જગ્યાઓએ માસ્ક પહેરવાનું ફરજિયાત બનાવવા, જીનોમ સિક્વન્સિંગ વધારવા અને કોરોના રસીનો ત્રીજો ડોઝ લોકોને વહેલી તકે આપવા પર ભાર મૂકવામાં આવ્યો હતો.

આ બેઠકોનું આયોજન ઉત્તર પ્રદેશ, ઝારખંડ, પશ્ચિમ બંગાળ, મધ્ય પ્રદેશ, કર્ણાટક, તમિલનાડુ, ઉત્તરાખંડ અને હિમાચલ પ્રદેશમાં કરવામાં આવ્યું હતું. આમાંના ઘણા રાજ્યોમાં, અધિકારીઓ અને મંત્રીઓએ સાવચેત રહેવાની સલાહ આપી પરંતુ કહ્યું કે, ગભરાવાની કંઈ નથી. કોરોના વાયરસને લઈને વધી રહેલી આશંકાઓ વચ્ચે ફરી એકવાર માસ્ક હટાવવાનું શરૂ થઈ ગયું છે.

દિલ્હી AIIMSમાં માસ્ક ફરજિયાત

કોરોનાના વધતા જતા કેસોને જોતા દિલ્હી AIIMS એ એડવાઈઝરી જાહેર કરી છે. આ મુજબ હવે એઈમ્સના સ્ટાફે હોસ્પિટલ પરિસરમાં કોવિડ નિયમોનું પાલન કરવું પડશે. કેમ્પસમાં માસ્ક પહેરવાનું ફરજિયાત કરવામાં આવ્યું છે. આ સાથે AIIMS કેમ્પસમાં પાંચથી વધુ લોકોના એકઠા થવા પર પણ પ્રતિબંધ લગાવી દેવામાં આવ્યો છે.

યુપીમાં ભીડ વાળા સ્થળોએ માસ્ક જરૂરી

ઉત્તર પ્રદેશના મુખ્યમંત્રી યોગી આદિત્યનાથે અધિકારીઓને કોવિડ ટેસ્ટિંગ અને જીનોમ સિક્વન્સિંગ વધારવાનો નિર્દેશ આપ્યો છે. તેમણે અધિકારીઓને એ સુનિશ્ચિત કરવા પણ કહ્યું છે કે, લોકો ભીડવાળી જગ્યાએ માસ્ક પહેરે. 

કર્ણાટકમાં સરકાર એલર્ટ 

કોરોનાના વધતા જતા ખતરાને જોતા કર્ણાટકના આરોગ્ય મંત્રી કે સુધાકરે કહ્યું કે, ઇનડોર વિસ્તારોમાં બંધ જગ્યાઓ અને એર કન્ડીશનીંગવાળા વિસ્તારોમાં માસ્ક લગાવવાનું ફરી એકવાર ફરજિયાત કરવામાં આવ્યું છે. મંત્રીએ મુખ્યમંત્રી સાથેની બેઠક બાદ કહ્યું કે, આંતરરાષ્ટ્રીય એરપોર્ટ પર આવતા મુસાફરોની રેન્ડમ ચેકિંગ અને સ્ક્રીનિંગ પણ કરવામાં આવશે. આ સિવાય મુંબઈના મુમ્બા દેવી મંદિર મેનેજમેન્ટે ભક્તોને મંદિરમાં દર્શન દરમિયાન માસ્ક પહેરવાના આદેશનું પાલન કરવાની અપીલ કરી છે.

બંગાળમાં મુખ્યમંત્રી મમતા બેનર્જીએ શું કહ્યું ? 

બંગાળના મુખ્યમંત્રી મમતા બેનર્જીએ બુધવારે એટલે કે 21 ડિસેમ્બરે રાજ્ય પ્રશાસનને દેખરેખ વધારવાનો નિર્દેશ આપ્યો હતો. તેમણે આરોગ્ય અધિકારીઓને જાન્યુઆરી 2023માં ગંગા સાગર મેળા પહેલા કોરોના સંક્રમણ સંબંધિત તમામ પાસાઓ પર ખાસ નજર રાખવા સૂચના આપી હતી. આ તરફ કેરળમાં આરોગ્ય પ્રધાન વીણા જ્યોર્જે કહ્યું કે, પરિસ્થિતિની સમીક્ષા કરવામાં આવી છે અને ગભરાવાની જરૂર નથી.

તમિલનાડુ-ઝારખંડમાં તંત્ર એલર્ટ

કોરોનાના વધતા ખતરાને ધ્યાનમાં રાખીને તમિલનાડુના મુખ્ય પ્રધાન એમકે સ્ટાલિને ગુરુવારે એક સલાહકાર બેઠકની આગેવાની કરી અને અધિકારીઓને તમામ સકારાત્મક નમૂનાઓની જીનોમ સિક્વન્સિંગ હાથ ધરવા નિર્દેશ આપ્યો. રાજ્યએ કેન્દ્ર સરકારને ચીન અને હોંગકોંગથી આવતા આંતરરાષ્ટ્રીય મુસાફરોના ફરજિયાત પરીક્ષણ માટે માર્ગદર્શિકા જારી કરવા પણ જણાવ્યું હતું. ઝારખંડમાં કોરોનાનો કોઈ સક્રિય કેસ નોંધાયેલ નથી. આરોગ્ય મંત્રીએ કહ્યું કે, ચિંતા કરવાનું કોઈ કારણ નથી, પરંતુ વહીવટીતંત્ર સતર્ક રહેવા કેન્દ્રના સૂચન પર ધ્યાન આપી રહ્યું છે.