1 એપ્રિલથી નવુ નાણાકીય વર્ષ શરૂ થઇ રહ્યુ છે. આ નવા વર્ષ સામાન્ય લોકો માટે રાહતના અનેક સમાચાર છે. જોકે આ સાથે જ લોકોએ મોંઘવારીનો માર પણ સહન કરવો પડશે.
નવા નિયમ અનુસાર, પ્રથમ એપ્રિલથી અમુક મોટા ફેરફાર થશે જેની સીધી અસર લોકોના ખિસ્સા પર પડશે. તો ચાલો જાણીએ 1 એપ્રિલથી શું સસ્તું થશે અને કોઈ વસ્તુની કિંમતમાં વધારો થશે.
શું સસ્તું થશે?
ઘર ખરીદવું થશે સસ્તું :
1 એપ્રિલ, 2019થી ઘર ખરીદવું સસ્તું થશે. GST કાઉન્સિલે પ્રથમ એપ્રિલથી GST પર નવા રેટ લાગૂ કરવાનો આદેશ કર્યો છે. જે બાદમાં બાંધકામ હેઠળ હોય તેવા ઘરો પર 12 ટકાના બદલે 5 % GST લાગશે. જ્યારે અફોર્ડેબલ હાઉસ પર GST દર 8 % થી ઘટાડીને 1 % કરી દેવામાં આવ્યો છે. જેનાથી ઘર બનાવવું સસ્તું થશે. જેનો ફાયદો ઘર ખરીદી કરવાનારને મળશે.
જીવન વીમો થશે સસ્તો :
1 એપ્રિલથી જીવન વીમો ખરીદવો સસ્તો થશે. હકીકતમાં પ્રથમ એપ્રિલથી કંપનીઓ મૃત્યુદરના નવા આંકડાઓનું પાલન કરશે. અત્યાર સુધી વીમા કંપનીઓ 2006-08ના ડેટાનો ઉપયોગ કરતી હતી. આને બદલીને 2012-14 કરી દેવામાં આવ્યો છે. આ નવા બદલાવનો સૌથી વધારે ફાયદો 22થી 50 વર્ષની વયના લોકોને થશે.
લોન લેવાનું થશે સસ્તુ :
એપ્રિલથી તમામ પ્રકારની લોન લેવાનું સસ્તું થઈ જશે. બેંક MCLRના બદલે RBIના રેપો રેટ પર લોન આપશે. આનાથી તમામ પ્રકારની લોન સસ્તી થવાની આશા છે. RBI રેપો રેટ ઘટાડે તેની સાથે જ બેંકોએ વ્યાજદરોમાં ઘટાડો કરવો પડશે. હાલ બેંકો જાતે જ નક્કી કરે છે કે વ્યાજદરોમાં ક્યારે વધારો કે ઘટાડો કરવો છે.
શું મોંઘું થશે?
કારની ખરીદી મોંઘી બનશે :
1 એપ્રિલથી કારની ખરીદી મોંધી બનશે. પ્રથમ એપ્રિલથી ભારતીય બજારમાં રહેલી કાર કંપની જેવી કે ટાટા મોટર્સ, રેનોલ્ટ ઇન્ડિયા, જગુઆર લેન્ડ રોવર ઇન્ડિયા (જેએલઆર) મહિન્દ્રા એન્ડ મહિન્દ્રા, ટોયોટા મોટર્સે પોતાની પ્રોડક્ટની કિંમતોમાં વધારો કરવાનો નિર્ણય કર્યો છે. કંપનીઓનું કહેવું છે કે ઉત્પાદન ખર્ચ વધવા ઉપરાંત બહારના આર્થિક કારણોને કારણે મોડલોની કિંમતમાં વધારો કરવા માટે તેઓ મજબૂર છે.
ગાડી ચલાવવી મોંઘી બનશે :
1 એપ્રિલથી ગાડી ચલાવવું મોંઘું બનશે. હકીકતમાં પ્રાકૃતિક ગેસની કિંમતોમાં 18 % નો વધારો થવાની આશા છે. જેના કારણે CNGના ભાવ વધી જશે. કહેવામાં આવી રહ્યું છે કે નવી કિંમતો પ્રથમ એપ્રિલ, 2019થી લાગૂ થશે. નોંધનીય છે કે નવી ડોમેસ્ટિક ગેસ પોલીસી 2014 અંતર્ગત દર છ મહિને નેચરલ ગેસની કિંમત નક્કી કરવામાં આવે છે. આ ફોર્મ્યુલા વિદેશી કિંમતો પર આધારિત છે.
PNGનો ભાવ વધારો :
સરકાર ડોમેસ્ટિક નેચરલ ગેસની કિંમતોમાં વધારો કરશે તો રસોઈ માટે વાપરવામાં આવતા PNGના ભાવમાં પણ વધારો થઈ શકે છે. ગેસની કિંમત વધારાની સીધી અસર ગૃહિણીઓના બજેટ અને રસોડા પર પડશે.