આગાહી / દેશમાં ફરી વેસ્ટર્ન ડિસ્ટર્બન્સ એક્ટિવઃ આ રાજ્યોમાં વરસાદ સાથે હિમવર્ષાનું એલર્ટ, વર્તાશે ઠંડીનો કહેર

• દેશમાં મોસમ ફરી મિજાજ બદલશે: ઉત્તરાખંડમાં વરસાદ-હિમવર્ષાનું એલર્ટ 
• દેશમાં ફરી વેસ્ટર્ન ડિસ્ટર્બન્સ એક્ટિવઃ પૂર્વનાં રાજ્યોમાં ધુમ્મસનો કહેર
• પહાડી વિસ્તારોમાં વીજળી પડવાનું એલર્ટ, દેશમાં બદલાશે હવામાનનો મિજાજ

ઉત્તર ભારતમાં ફરી એક વાર હવામાન મિજાજ બદલી રહ્યું છે. પહાડી વિસ્તારમાં ભારે હિમવર્ષા બાદ ફરી તાપમાનમાં ઘટાડો થવાની શક્યતા વધી છે. હવામાન વિભાગ અનુસાર આગામી દિવસોમાં ઉત્તર ભારતમાં બે ડિગ્રી તાપમાન ઘટી શકે છે, સાથે-સાથે કેટલાક વિસ્તારમાં વરસાદ થવાની પણ આગાહી છે. હિમાચલ પ્રદેશમાં હિમવર્ષા અને વરસાદ સાથે તાપમાનમાં ઘટાડો થવાની આગાહી છે. દિલ્હીનું તાપમાન પણ ઘટશે. દિલ્હીના તાપમાનમાં ઘટાડો થવાની સાથે આગામી બે દિવસ વાદળછાયું વાતાવરણ રહેશે. જમ્મુ-કાશ્મીરમાં વરસાદ અને હિમવર્ષાનું એલર્ટ હવામાન વિભાગે જાહેર કર્યું છે.

ઇરાન તરફથી આવી રહેલા પશ્ચિમી પવનોના કારણે હિમાચલના વાતાવરણમાં ફરી બદલાવ આવી રહ્યો છે. બીજી તરફ પૂર્વોત્તરનાં રાજ્યો સિક્કિમ, આસામના કેટલાક વિસ્તારમાં ધુમ્મસનો કહેર વર્તાશે. પંજાબના કેટલાક વિસ્તારમાં વરસાદ થવાની સંભાવના છે. રાજસ્થાનના બિકાનેર, જેસલમેર અને આસપાસના વિસ્તારમાં આવતી કાલ સુધીમાં ઝડપી પવન ફુંકાશે. પંજાબ અને હરિયાણામાં પણ ઠંડીનો કહેર હજુ ચાલે છે, જ્યારે ઉત્તર કાશી, ચમોલી, પિથોરાગઢ, રુદ્રપ્રયાગ અને બાગેશ્વરમાં વરસાદ થવાની સંભાવના છે, જ્યારે દહેરાદૂનમાં વાદળછાયું વાતાવરણ રહેશે, જોકે કેટલાક પહાડી વિસ્તારમાં વીજળી પડવાનું એલર્ટ હવામાન વિભાગે જાહેર કર્યું છે.

હવામાન વિભાગના જણાવ્યા અનુસાર ઉત્તર-પશ્ચિમ ભારતના મેદાની વિસ્તારમાં ઠંડી વધશે. હિમાચલ પ્રદેશમાં હિમવર્ષા અને વરસાદ સાથે તાપમાનમાં ઘટાડો થશે. ઉપરાંત મોટા ભાગનાં સ્થળોએ વરસાદ અને હિમવર્ષા ચાલુ રહેશે. આગામી 48કલાક દરમિયાન ઉત્તરાખંડમાં લોકોને કડકડતી ઠંડીનો સામનો કરવો પડશે એટલું જ નહીં, વરસાદ અને હિમવર્ષાનો સામનો પણ કરવો પડી શકે છે. બીજી તરફ રાજસ્થાનના તાપમાનમાં વધારો થયો છે.