રાજનીતિ / બંગાળમાં હિંસા યથાવત, TMC નેતાની ગોળી મારી કરાઇ હત્યા

લોકસભા ચૂંટણી બાદ પણ બંગાળમાં હિંસા બંધ થઈ નથી. આજે પણ બંગાળમાં વધુ એક નેતાની હત્યાની ઘટના સામે આવી છે. આ ઘટના 24 પરગનાની છે જ્યાં ટીએમસીના નેતા તથા દમદમનગર નિગમ બોર્ડના અધ્યક્ષ નિર્મલ કુંડુની ગોળી મારીને હત્યા કરી દેવામાં આવી છે. બાઈક પર આવેલા અજાણ્યા શખ્સોએ નિર્મલ કુંડુ પર ગોળીબાર કરીને ફરાર થઇ ગયા હતા.

જો કે આ સંપૂર્ણ ઘટના સીસીટીવી કેમેરામાં કેદ થઈ છે. ટીએમસી નેતા નિર્મલ કુંડાની હત્યા બાદ પોલીસ પણ ઘટના સ્થળે પહોંચી હતી. પોલીસે સીસીટીવી ફૂટેજ કબજે કરીને વધુ તપાસ હાથ ધરી છે. ઉલ્લેખનીય છે કે, બંગાળમાં ચૂંટણી સમયથી શરૂ થયેલો હત્યાનો સિલસિલો હજુ પણ યથાવત છે. ટીએમસી આ હત્યાનો આરોપ ભાજપ પર લગાવી રહી છે.

મહત્વનું છે કે, અગાઉ ઉત્તર 24 પરગનામાં ભાજપના એક નેતાની ચાકૂ મારીને હત્યા કરી દેવાની ઘટના સામે આવી હતી. પશ્ચિમ બંગાળના મુખ્યમંત્રી અને ટીએમસીના અધ્યક્ષ મમતા બેનર્જીનો ઘણા બધા મામલાને લઇને તત્કાલીન ભાજપ અધ્યક્ષ અમિત શાહ સાથે વિવાદ જોવા મળ્યો હતો.