પશ્ચિમ બંગાળમાં શિક્ષક ભરતી કૌભાંડમાં સંડોવાયેલા મમતા સરકારના મંત્રીની મુશ્કેલીઓ વધી રહી છે. તેમના પર આ કૌભાંડ અંતર્ગત હવે નવો ખુલાસો થયો છે.
પશ્ચિમ બંગાળમાં શિક્ષક કૌભાંડમાં નવો ખુલાસો
કેબિનેટ મંત્રી પાર્થ ચટર્જીના બોડીગાર્ડના સગાઓને નોકરીઓ આપી
હાઈકોર્ટમાં વધુ એક નવી અરજી દાખલ થઈ
પશ્ચિમ બંગાળમાં શિક્ષક ભરતી કૌભાંડના આરોપમાં ધરપકડ થયેલા કેબિનેટ મંત્રી પાર્થ ચટર્જી પર એક નવો ખુલાસો થયો છે. તેમના વિરુદ્ધ કલકત્તા હાઈકોર્ટમાં એક અરજી દાખલ કરવામાં આવી છે. તેમાં આરોપ લગાવામાં આવ્યો છે કે, પાર્થે પોતાના બોડીગાર્ડના 10 સંબંધીઓને સ્કૂલમાં નોકરીઓ અપાવવામાં મદદ કરી હતી. હાઈકોર્ટે આ કેસને પણ મૂળ કેસ સાથે જોડવાના આદેશ આપ્યા છે. સાથે જ અરજીકર્તા પાસેથી 17 ઓગસ્ટ સુધીમાં વિગતવાર માહિતી જમા કરાવવાનું કહ્યું છે.
બોર્ડીગાર્ડના સંબંધીઓને લાગવગથી નોકરીઓ આપી
અરજીકર્તાના વકીલ સુદીપ્તો દાસગુપ્તાએ જણાવ્યું છે કે, કેબિનેટ મંત્રી પાર્થ ચટર્જીના બોડીગાર્ડનું નામ બિશંભર મંડલ છે. તે ઈસ્ટ મિદનાપુર જિલ્લાના ચાંદીપુરનો રહેવાસી છે. આ ભરતી કૌભાંડમાં તેના કેટલાય સંબંધીઓને નોકરીઓ આપવામાં આવી છે. તેમાં તેના બંને ભાઈ બંગ્શાગોપાલ અને દેવ ગોપાલ પણ સામેલ છે. આ ઉપરાંત તેના બીજા ભાઈઓને પણ નોકરી આપી હોવાની વિગતો સામે આવી છે. તેમણે કહ્યું કે, અમે હાઈકોર્ટમાં આ મુદ્દો ઉઠાવ્યો છે. કોર્ટે તેને પણ મેઈન કૌભાંડ કેસ સાથે જોડવાનો આદેશ આપ્યો છે.
ઈડી કલકત્તામાં કરી રહી છે પૂછપરછ
આ બાજૂ રાજ્યના ઉદ્યોગ અને વાણિજ્ય મંત્રી પાર્થ ચટજીને ઈડી એઈમ્સ ભુવનેશ્વરમાં મેડીકલ તપાસ બાદ કલકત્તા પાછા લઈ આવ્યા અને ઈડી કાર્યાલયમાં તેમની પુછપરછ થઈ રહી છે. સત્તાધારી ટીએમસી મહાસચિવ ચટર્જીને ઈડીએ 23 જૂલાઈના રોજ ધરપકડ કરી હતી. તે 2014થી 2021 દરમિયાન રાજ્યના શિક્ષણમંત્રી હતા. આ કથિત કૌભાંડ તે દરમિયાન થયું હોવાનું કહેવાય છે. 22 જૂલાઈના રોજ પાર્થ ચટર્જીના ઘરે ઈડીએ દરોડા પાડ્યા હતા. જ્યાં કેટલાય મહત્વના દસ્તાવેજો હાથ લાગ્યા હતા.
પાર્થ ચટર્જીના ઘરેથી આટલી વસ્તુઓ મળી આવી
ઈડીના જણાવ્યા અનુસાર, પ્રાથમિક શિક્ષક પદની 48 અરજીના રોલ નંબર સહિત યાદી, ગ્રુપ ડી સ્ટાફની ભરતી સંબંધિત દસ્તાવેજો, ભરતી પ્રક્રિયામાં પ્રવેશ પત્ર અને ઉમેદવારોની એક યાદીનું લિસ્ટ તથા ટીએમસીના એક પૂર્વ ધારાસભ્યનું લેટરહેડ જપ્ત થયું છે. આ અગાઉ ઈડીએ પાર્થ ચટર્જીની સહયોગી અર્પિતાના ઠેકાણા પરથી 21 કરોડ રૂપિયા રોકડા જપ્ત કર્યા અને અન્ય સામાન પણ જપ્ત કર્યો હતો.