પશ્ચિમ બંગાળમાં પ્રથમ તબક્કાનું મતદાન આજથી ચાર દિવસ બાદ થશે. જો કે આની પહેલા એક જાણીતા ઓપિનિયન પોલમાં બંગાળની જનતાના મનને વાંચવાનો પ્રયાસ કરવામાં આવ્યો છે.
આ સર્વે અનુસાર મમતા દીદીને સત્તા મેળવવામાં પડી શકે છે મુશ્કેલી
ભાજપને આક્રમક પ્રચાર અને વ્યૂહાત્મક રણનીતિનો મળશે ફાયદો
ABP ન્યુઝ ચેનલ માટે CNX એજન્સી દ્વારા આ સર્વે કરવામાં આવ્યો છે, જેમાં એ જાણવાનો પ્રયાસ કરવામાં આવ્યો છે કે શું બંગાળમાં આ ચૂંટણી પછી મમતા બેનર્જી ફરી એકવાર સત્તામાં પાછા ફરશે કે ભાજપ જીતશે, અથવા તો કોંગ્રેસ, ડાબેરી અને આઈએસએફ ગઠબંધન કિંગ મેકર બનશે કે કેમ?
મમતા 'દીદી'ને સત્તામાં પરત ફરવામાં પડી શકે છે મુશ્કેલી
ABP ન્યૂઝ માટે CNX દ્વારા તાજેતરના સર્વે અનુસાર, મમતા બેનરજીની પાર્ટી TMC ને પશ્ચિમ બંગાળની 294 બેઠકોની 294 બેઠકોમાં 136 થી 146 બેઠકો મળવાનો અંદાજ છે. એટલે કે, તેની સ્પષ્ટ બહુમતી આવવાની શક્યતાઓ ધૂંધળી થતી દેખાઈ રહી છે, મહત્વનું છે કે બંગાળમાં કોઈપણ પક્ષ કે ગઠબંધનને સરકાર બનાવવા માટે 148 બેઠકો મેળવવી જરૂરી છે.
સર્વે મુજબ ભાજપને 130 થી 140 બેઠકો મળી શકે છે. એટલે કે, સ્પર્ધા ખૂબ કસોકસની બની શકે છે. કોંગ્રેસ અને ડાબેરીઓના ગઠબંધનને 14 થી 18 બેઠકો મળવાની સંભાવના છે. જ્યારે અન્ય પાસે ફક્ત 1 થી 3 બેઠકો જઈ શકે છે.
મહત્વનું છે કે વર્ષ 2016ની વિધાનસભાની ચૂંટણીમાં તૃણમુલ કોંગ્રેસ (TMC)એ 211 બેઠકો જીતીને સરકાર બનાવી હતી જ્યારે કે ભાજપને માત્ર ત્રણ બેઠકોથી સંતોષ માનવો પડ્યો હતો. આ ચૂંટણીમાં કોંગ્રેસને 44 બેઠકો મળી હતી અને ડાબેરીઓને 26 બેઠકો મળી હતી. આ વખતે પશ્ચિમ બંગાળમાં આઠ તબક્કામાં મતદાન યોજાશે અને 2 મેના રોજ મત ગણતરી કરવામાં આવશે.