પશ્ચિમ બંગાળમાં ચૂંટણી પહેલા બે ઓપનિયન પોલ સામે આવ્યા છે જેમાં એક સર્વેમાં ભાજપની સરકાર બની રહી છે પરંતુ અમિત શાહના દાવાને ઝટકો લાગ્યો છે.
C-Voterના સર્વે મુજબ બંગાળમાં ભાજપ મારશે બાજી
જોકે 53 ટકા લોકો CM તરીકે દીદીને કરે છે પસંદ
CNXના સર્વેમાં મમતા બેનર્જી આગળ
CNXના સર્વે મુજબ દક્ષિણ બંગાળમાં TMCનો દબદબો યથાવત રહેશે
પશ્ચિમ બંગાળમાં ચૂંટણીનો માહોલ ગરમ છે ત્યારે બે જુદા જુદા સર્વે સામે આવ્યા છે. આ સર્વેમાં સી વોટરના સર્વે અનુસાર બંગાળમાં ભાજપ સરકાર બનાવશે તેવું અનુમાન છે જ્યારે CNXના સર્વેમાં ફરીવાર મમતા બેનર્જીની જ વાપસી થઈ રહી છે. CNXના સર્વેમાં મમતા બેનર્જીને 151 જ્યારે ભાજપને 117 સીટ મળવાનું અનુમાન છે.
CNXના સર્વે અનુસાર દક્ષિણ બંગાળમાં મમતા બેનર્જીની પાર્ટીનો દબદબો દેખાઈ રહ્યો છે જ્યાં 84માંથી 53 બેઠકો ટીએમસીના ખાતામાં જતી દેખાઈ રહી છે અને ભાજપના હાથમાં 16 બેઠકો મળવાનું અનુમાન છે.
સીવોટરના સર્વે મુજબ બંગાળમાં ભાજપની સરકાર બની શકે
C-Voterના સર્વેમાં બંગાળમાં ભાજપનો ભગવો લહેરાશે તેવું અનુમાન છે. સર્વેમાં 43 ટકા લોકોનું માનવું છે કે રાજ્યમાં ભાજપ સરકાર બનાવી શકે છે. જ્યારે 35 ટકા લોકો કહી રહ્યા છે કે મમતા દીદી જ ફરીથી બંગાળની રાજગાદી પર આવશે. 14 ટકા લોકો કોંગ્રેસ-લેફ્ટ તથા 2 ટકા લોકો ત્રિશંકુ વિધાનસભાની સંભાવના દર્શાવી રહ્યા છે.
52 ટકા લોકોએ CM તરીકે મમતા બેનર્જીને ગણાવ્યા યોગ્ય
સીવોટરના સર્વેમાં લોકો ભાજપની સરકાર બનવાનું કહી રહ્યા છે પરંતુ મુખ્યમંત્રીના ચહેરામાં મમતા બેનર્જી જ આજે પણ પણ લોકોની પહેલી પસંદ છે. 52 ટકા લોકો માને છે કે મમતા બેનર્જી સીએમ પદ માટે સૌથી ઉત્તમ છે. જોકે ભાજપ 25 ટકા સાથે બીજા સ્થાન પર છે. અધીર રંજન ચૌધરીને 2 ટકા સીએમ તરીકે જોવા માંગે છે. આ સર્વેમાં 4 ટકા લોકો એવા છે જે સૌરવ ગાંગુલીને સીએમ પદ માટે યોગ્ય માને છે.
ભાજપની બેઠકોમાં વધારો થઈ શકે પણ 200નો આંકડો મેળવવો મુશ્કેલ
જોકે આ બંને સર્વેથી ભાજપના ચાણક્ય ગણાતા અમિત શાહને ઝટકો લાગશે કારણ કે તેઓ દાવો કરી રહ્યા છે કે રાજ્યમાં 200 બેઠકો સાથે સરકાર બનશે. જોકે બંને સર્વેમાં 200 બેઠકો મળવી હાલ તો મુશ્કેલ જણાઈ રહી છે.