રાજનીતિ / પશ્ચિમ બંગાળમાં ખેલા હોબે! પેટાચૂંટણીના પરિણામોમાં દીદીનો દબદબો, ભાજપને ફરી લાગ્યો ઝટકો 

• પશ્ચિમ બંગાળ પેટાચૂંટણી તૃણમૂલ કોંગ્રેસ ચારેય બેઠકો પર આગળ છે
• 8 વાગ્યાથી શરૂ થયેલી મતગણતરીમાં હાલ દીદીની પાર્ટી આગળ ચાલી રહી છે
• પશ્ચિમ બંગાળની હાઈપ્રોફાઈલ સીટમાં ટીએમસી આગળ ચાલી રહી છે 

પશ્ચિમ બંગાળ પેટાચૂંટણીમાં  તૃણમૂલ કોંગ્રેસનો દબદબો યથાવત 

પશ્ચિમ બંગાળની 4 સીટો પર પેટા ચૂંટણીમાં તૃણમૂલ કોંગ્રેસ આગળ ચાલી રહી છે. સવારે 8 વાગ્યાથી શરૂ થયેલી મતગણતરીના પ્રારંભિક વલણોમાં મમતા બેનેર્જીની પાર્ટી આગળ ચાલી રહી છે. દિનહાટા, ગોસાબા, ખરદહા અને શાંતિપુર વિધાનસભા બેઠકોની પેટાચૂંટણી માટે 30મી ઓક્ટોબરે મતદાન થયું હતું. મે મહિનામાં બંગાળમાં સત્તામાં પરત ફરેલી ટીએમસી, આ બેઠકો પર પણ પોતાનો દબદબો દર્શાવે છે કે મમતા બેનર્જીની વર્ચસ્વ અકબંધ છે. દિનહાટામાં TMCએ દિગ્ગજ નેતા ઉદયન ગુહાને ભાજપના અશોક મંડલ સામે ચૂંટણીની સીઝનમાં ઉતાર્યા હતાં. આજ વર્ષે યોજાયેલી વિધાનસભાની ચૂંટણીમાં ભાજપે આ બેઠક પર બહુ ઓછા અંતરથી જીત મેળવી હતી.

દિનહાટામાં ઉદયન ગુહા 14,000 વોટથી આગળ છે.

હાલમાં TMCના ઉદયન ગુહા બીજા રાઉન્ડ સુધી આ સીટ પર 14,000 વોટથી આગળ છે. તાજેતરમાં ભાજપે નિસિથ પ્રામાણિકને કેન્દ્રીય મંત્રી બનાવ્યા હતાં. અને તેના કારણે આ બેઠક ખાલી પડી હતી. પ્રમાણિકે સંસદમાં જવા માટે આ બેઠક ખાલી કરી હતી. આ સિવાય બીજેપી સાંસદ જગન્નાથ સરકારે શાંતિપુર વિધાનસભા સીટ જીત્યા બાદ પણ સીટ ખાલી કરી દીધી હતી. તેઓ લોકસભાના સાંસદ જ રહેવા માંગતા હતાં.અત્યાર સુધીની ગણતરીના પ્રથમ રાઉન્ડમાં TMC ઉમેદવાર બ્રજ કિશોર ગોસ્વામી 6,365 મતોથી આગળ છે.

TMC ખરદહાથી પણ આગળ છે, જેને હાઈપ્રોફાઈલ સીટ કહેવાય છે

આ સિવાય TMC ખરદહાથી પણ આગળ છે, જેને હાઈપ્રોફાઈલ સીટ કહેવાય છે. ટીએમસીમાંથી ધારાસભ્ય તરીકે ચૂંટાયેલા કાજલ સિન્હાના અકાળ અવસાન બાદ અહીં ચૂંટણી યોજાઈ રહી છે. ટીએમસીએ આ બેઠક પરથી મંત્રી અને વરિષ્ઠ નેતા શોભનદેવ ચેટરજીને મેદાનમાં ઉતાર્યા હતા. કાજલ સિંહાનું મોત કોરોના સંક્રમણને કારણે થયું હતું. શોભનદેવ ચેટર્જી ભવાનીપુર વિધાનસભા સીટ પરથી ચૂંટાયા હતા, જે તેમણે સીએમ મમતા બેનરજી માટે ખાલી કરી હતી. આ સિવાય ગોસાબા સીટ પર પણ ટીએમસીના ઉમેદવારે આગેકૂચ જાળવી રાખી છે.