બોલીવુડ સ્ટાર મિથુન ચક્રવર્તી ભાજપમાં જોડાઈ ગયા છે અને પ્રચાર કરી રહ્યા છે. જોકે તેઓ ચૂંટણી લડશે કે નહીં તેને લઇને અટકળો ચાલી રહી છે. તો ભાજપ તેને લડવાની અપીલ કરી શકે છે.
બોલીવુડ સ્ટાર મિથુન ચક્રવર્તી ભાજપમાંથી કરી રહ્યા છે પ્રચાર
ભાજપ મિથુન ચક્રવર્તીને ચૂંટણી લડવાની અપીલ કરી શકે છે
મિથુન ચક્રવર્તી વિધાનસભાની ચૂંટણી લડશે કે નહીં?
દેશના પાંચ રાજ્ય પશ્ચિમ બંગાળ, કેરળ, આસામ, તામિલનાડુ અને પુડ્ડુચેરીમાં વિધાનસભા ચૂંટણીઓને લઇને રાજકારણ ગરમાયું છે. આ બધા વચ્ચે સૌથી વધુ ચર્ચા બંગાળ ચૂંટણીને લઇને થઇ રહી છે. અહીં ભાજપ અને ટીએમસી વચ્ચે સીધી અને મજબૂત ટક્કર નજરે આવી રહી છે, પરંતુ કેટલીક વાતો એવી છે કે જે ભાજપ માટે મુશ્કેલીઓ ઉભી કરી રહી છે. પશ્ચિમ બંગાળ ચૂંટણીના એક્સપર્ટને પણ મુંજવણમાં મુકી દીધા છે. બંગાળમાં જાતિ અને ધર્મની ચૂંટણી ગણિત કામ કરશે કે પછી ચૂંટણી કેમિસ્ટ્રીથી ભાજપ અહીંથી સત્તામાં આવી શકે છે.
બોલીવુડ સ્ટાર મિથુન ચક્રવર્તી ભાજપમાં જોડાઈ ગયા છે અને પ્રચાર કરી રહ્યા છે. મિથુન ભાજપમાં જોડાયા ત્યારથી જ તે ચૂંટણી લડશે કે નહીં તેને લઈને અટકળો લગાડવાનું શરૂ કરી દેવામાં આવ્યું હતુ. આ વચ્ચે સમાચાર આવી રહ્યા છે કે આજે ભાજપ વેટરન એક્ટર મિથુન ચક્રવર્તીને ચૂંટણી લડવાની અપીલ કરી શકે છે. જેને લઇને મમતા બેનર્જી અને ટીએમસીનું ટેન્શન વધી શકે છે. ચક્રવર્તી હાલમાં જ ભાજપમાં સામેલ થયા છે. જોકે, તેમણે ચૂંટણી લડ્યા વગર ભાજપના પક્ષમાં પ્રચાર કરવાની વાત કહી હતી.
જોકે મિથુન આગામી વિધાનસભાની ચૂંટણી નહીં લડે તેવું નિવેદન થોડા દિવસ અગાઉ ભાજપના નેતા કૈલાશ વિજયવર્ગીયએ આપ્યું હતું. આ સાથે તેમને જણાવ્યું હતું કે મિથુને ચૂંટણી લડવાની ના પાડી છે અને જો પક્ષ કોઈ નિર્ણય કરશે તો મિથુન સાથે વાત કરવામાં આવશે. ત્યારે હવે એવી ચર્ચા ચાલી રહી છે કે ભાજપ મિથુન ચક્રવર્તીને ચૂંટણી લડવા માટે અપીલ કરી શકે છે.
મિથુન ચક્રવર્તીને કેન્દ્ર દ્વારા Y પ્લસ સુરક્ષા આપવામાં આવી
બોલીવુડ સ્ટાર મિથુન ચક્રવર્તીને કેન્દ્ર દ્વારા Y પ્લસ સુરક્ષા આપવામાં આવી છે તેને લઈને CISF દ્વારા સુરક્ષા આપવાની પ્રક્રિયા પણ શરૂ કરી દેવામાં આવી છે. ઉલ્લેખનીય છે કે થોડા સમય પહેલા જ મિથુન ચક્રવર્તીએ કોલકત્તાની બ્રિગેડ ગ્રાઉન્ડ રેલીમાં PM મોદીની હાજરીમાં ભાજપમાં પ્રવેશ કર્યો હતો.