વિધાનસભા ચૂંટણી / બંગાળમાં કેટલાક મતદાન મથકો પર 4 મિનિટમાં એવું બન્યું કે TMCએ ચૂંટણી પંચને કરી ફરિયાદ

• પશ્ચિમ બંગાળમાં પ્રથમ તબક્કાનુ મતદાન
• મતદાનની ટકાવારી અચાનક ઓછી થવા અંગે ફરિયાદ
• તૃણમૂલ કોંગ્રેસ તરફથી ચૂંટણી પંચમાં ફરિયાદ કરી

પશ્ચિમ બંગાળ અને આસામમાં પ્રથમ તબક્કાનુ મતદાન ચાલી રહ્યું છે. ત્યારે પશ્ચિમ બંગાળના કેટલાક મતદાન કેન્દ્ર પર મતદાનની ટકાવારી અચાનક ઓછી થવાના મુદ્દા પર તૃણમૂલ કોંગ્રેસ તરફથી ચૂંટણી પંચમાં ફરિયાદ દાખલ કરવામાં આવી છે.

ટીએમસીએ ચૂંટણી પંચને મતદાન ટકાવારીમાં ગડબડની લેખિતમાં ફરિયાદ કરી છે. તૃણમૂલ કોંગ્રેસે કહ્યું કે, કાંથી દક્ષિણ(216) અને કાંથી ઉત્તર (213) મતદાન કેન્દ્રો પર સવારે 9.13 વાગ્યે મતદાન ટકાવારી ક્રમશઃ 18.47 ટકા અને 18.95 ટકા હતી પરંતુ ચાર મિનીટ બાદ 9.17 વાગ્યે આ ઘટીને ક્રમશઃ 10.60 ટકા અને 9.40 ટકા થઇ ગઇ. પાર્ટીએ કહ્યું કે, આ ગડબડ છે, ચૂંટણી પંચે આના પર સંજ્ઞાન લેવું જોઇએ.

જણાવી દઇએ કે, પશ્ચિમ બંગાળ વિધાનસભા ચૂંટણીના પહેલા તબક્કાનું મતદાન આજે થઇ રહ્યું છે. પશ્ચિમ બંગાળના 5 જિલ્લાઓની 30 વિધાનસભા બેઠકો માટે મતદાન થઇ રહ્યું છે. બંગાળમાં સવારે 12 વાગ્યા સુધીમાં 36.09 ટકા મતદાન નોંધાયું છે.