નેન્સી પેલોસીની મુલાકાત બાદ, ચીને બુધવારે કહ્યું હતું કે તે "એક-ચીન નીતિ" ના ઉલ્લંઘન માટે યુએસ અને તાઈવાન સામે "મજબૂત અને અસરકારક" જવાબી પગલાં લેશે
યુએસ હાઉસ ઓફ રિપ્રેઝન્ટેટિવ્સના સ્પીકરની તાઈવાન યાત્રા બાદ વિવાદ વધ્યો
ચીનની અમેરિકાને ખુલ્લી ચેલેન્જ: બસ, થોડી રાહ જુઓ, જે કહ્યું એ કરીને બતાવીશું
યુએસ અને તાઈવાન સામે "મજબૂત અને અસરકારક" જવાબી પગલાં લેવાશે: ચીન વિદેશ મંત્રાલય
યુએસ હાઉસ ઓફ રિપ્રેઝન્ટેટિવ્સના સ્પીકર નેન્સી પેલોસીની તાઈવાન યાત્રા બાદ વિવાદ વધ્યો છે. નેન્સી પેલોસીની મુલાકાત બાદ, ચીને બુધવારે કહ્યું હતું કે તે "એક-ચીન નીતિ" ના ઉલ્લંઘન માટે યુએસ અને તાઈવાન સામે "મજબૂત અને અસરકારક" જવાબી પગલાં લેશે. ચીનના વિદેશ મંત્રાલયના પ્રવક્તા હુઆ ચુનયિંગે અહીં એક મીડિયા બ્રીફિંગમાં કહ્યું, 'અમે જે કહ્યું છે તે કરીશું. શાંતિ જાળવો.' ચીન કહે છે કે, તાઈવાન તેનો એક ભાગ છે અને એક દિવસ તે મુખ્ય ભૂમિ સાથે ફરી જોડાઈ જશે. બેઇજિંગે સ્વ-શાસિત ટાપુને મુખ્ય ભૂમિ સાથે ફરીથી જોડવા માટે બળનો ઉપયોગ કરવાની સંભાવનાને નકારી નથી.
શું કહ્યું ચીનના વિદેશ મંત્રાલયે ?
ચુનયિંગ ચીનના સહાયક વિદેશ મંત્રી પણ છે. જ્યારે એમને પૂછવામાં આવ્યું કે, શું ચીન યુએસ નેતા પેલોસી તેમજ તાઈવાનના પ્રમુખ ત્સાઈ ઈંગ વેન જેવા તાઈવાનના નેતાઓ સામે પ્રતિબંધો લાદવાનું આયોજન કરી રહ્યું છે. ત્યારે ચુનયિંગે કહ્યું, "અમે જે કહ્યું છે તે કરીશું." આ પગલાં કડક, અસરકારક અને મક્કમ હશે. પેલોસીની તાઈવાનની સફળ મુલાકાત પછી ચીનના પ્રભાવ અંગે સવાલો ઉભા થઈ રહ્યા છે કારણ કે તેણે યુએસ હાઉસ સ્પીકરને ધમકી આપી હતી કે તે મુલાકાત પહેલા આવું થવા દેશે નહીં.
યુએસ એરફોર્સના વિમાન દ્વારા તાઈપેઈ પહોંચ્યા હતા નેન્સી પેલોસી
આ તરફ મંગળવારે રાત્રે ચીનની ધમકી પર ધ્યાન આપ્યા વિના પેલોસી યુએસ એરફોર્સના વિમાન દ્વારા તાઈપેઈ પહોંચ્યા હતા. જોકે તેમની મુલાકાત વિશ્વભરમાં હેડલાઇન્સ બની હતી. રસપ્રદ વાત એ છે કે, 82 વર્ષીય પેલોસીની મુલાકાતમાં તેમની સાથે તાઈવાન ગયેલા પ્રતિનિધિમંડળમાં યુએસ કોંગ્રેસના ભારતીય મૂળના સભ્ય, હાઉસ સ્ટેન્ડિંગ સિલેક્ટ કમિટિ ઓન ઈન્ટેલિજન્સનાં સભ્ય રાજા કૃષ્ણમૂર્તિનો સમાવેશ થતો હતો. તેમણે તાઇવાનની સફળ યાત્રા બાદ બુધવારે તાઇપેઇ છોડી દીધું હતું. તેમણે બેઠક દરમ્યાન કહ્યું હતું કે, આજે વિશ્વ લોકશાહી અને નિરંકુશતા વચ્ચે પસંદગીનો સામનો કરી રહ્યું છે. "યુનાઈટેડ સ્ટેટ્સ અહીં તાઈવાન અને સમગ્ર વિશ્વમાં લોકશાહીને જાળવી રાખવા માટે પ્રતિબદ્ધ છે.
જોકે નિરીક્ષકો કહે છે કે, પેલોસીની તાઇવાનની સફળ મુલાકાતે બેઇજિંગ માટે દબાણ ઊભું કર્યું છે. કારણ કે, તે ચીનના રાષ્ટ્રપતિ શી જિનપિંગના મજબૂત નેતાની છબીને કલંકિત કરે છે, જે આગામી થોડા મહિનામાં અભૂતપૂર્વ ત્રીજી મુદત જીતવાની અપેક્ષા રાખે છે. ચુનયિંગે પેલોસીની મુલાકાત દરમ્યાન તાઈવાનની આસપાસ ચીનની સૈન્ય કવાયત અને તાઈવાન સ્ટ્રેટમાં ફાઈટર જેટની તૈનાતીનો બચાવ કરતા કહ્યું કે, ચીનને સ્વ-બચાવમાં આવું કરવાની ફરજ પડી હતી. કારણ કે, યુએસ નેતાની મુલાકાતે ચીનની સાર્વભૌમત્વ અને પ્રાદેશિક અખંડિતતાનું ઉલ્લંઘન કર્યું છે.
ચીન અને તાઈવાનનો ઈતિહાસ શું ?
તાઇવાન એ દક્ષિણપૂર્વ ચીનના દરિયાકાંઠે આશરે 160 કિમી દૂર એક ટાપુ છે, જે ચીની શહેરો ફુઝોઉ, ક્વાંઝોઉ અને ઝિયામેનની સામે છે. તેના પર શાહી કિંગ રાજવંશનું શાસન હતું, પરંતુ તેનું નિયંત્રણ 1895માં જાપાનીઓ પાસે ગયું. બીજા વિશ્વયુદ્ધમાં જાપાનની હાર પછી આ ટાપુ ચીનના હાથમાં પાછો ફર્યો. માઓ ઝેડોંગની આગેવાની હેઠળના સામ્યવાદીઓએ મુખ્ય ભૂમિ ચીનમાં ગૃહયુદ્ધ જીત્યા બાદ રાષ્ટ્રવાદી કુઓમિન્ટાંગ પાર્ટીના નેતા ચિયાંગ કાઈ-શેક 1949માં તાઈવાન ભાગી ગયા હતા. ચિયાંગ કાઈ-શેકે ટાપુ પર ચીનના પ્રજાસત્તાકની સરકારની સ્થાપના કરી અને 1975 સુધી પ્રમુખ રહ્યા. જોકે ચીને ક્યારેય તાઈવાનના અસ્તિત્વને સ્વતંત્ર દેશ તરીકે માન્યતા આપી નથી. તેમની દલીલ છે કે, તે હંમેશા ચીનનો પ્રાંત હતો. તાઈવાનનું કહેવું છે કે, આધુનિક ચીની રાજ્યની રચના 1911ની ક્રાંતિ પછી જ થઈ હતી અને તે તે રાજ્ય અથવા પીપલ્સ રિપબ્લિક ઑફ ચાઈનાનો ભાગ નથી, જે સામ્યવાદી ક્રાંતિ પછી સ્થપાઈ હતી. બંને દેશો વચ્ચે રાજકીય ખેંચતાણ ચાલુ છે. તમને જણાવી દઈએ કે, ચીન અને તાઈવાનના પણ આર્થિક સંબંધો છે. ઘણા તાઈવાનના વિદેશીઓ ચીનમાં કામ કરે છે અને ચીને તાઈવાનમાં રોકાણ કર્યું છે.