ભુજ તાલુકાના વડઝર ગામમાં કોવિડ ગાઈડલાઈનના નિયમોનો ભંગ કરી લગ્ન યોજનાર ગામના મહિલા સરપંચના પતિ પૃથ્વીરાજસિંહ સોઢા સામે પોલીસે ગુનો નોંધાયો છે. મહત્વું છે કે, કોરોનાકાળમાં કચ્છના વડઝર ગામમાં લોકગાયિકા ગીતા રબારીનો સંગીત કાર્યક્રમ યોજાયો હતો. આ માટે કોઇપણ પ્રકારની મંજૂરી લેવામાં નહોતી આવી.
કોરોના મહામારી વચ્ચે કોવિડ નિયમોનો ભંગ કરી ભુજના વડઝર ગામમાં એક લગ્નપ્રસંગમાં ગીતા રબારીનો સંગીત કાર્યક્રમ યોજાયો હતો. અહીં અઢળક માણસો એકત્ર થતા આયોજક વિરુદ્ધ ગુનો દાખલ કરવામાં આવ્યો છે. ભુજ તાલુકાના વડઝર ગામે યોજાયેલ લગ્ન પ્રસંગમાં કોવિડ ગાઈડલાઈનના નિયમોના લીરેલીરા ઉડાડતો વિડીયો સોશિયલ મીડિયામાં વાયરલ થતા માનકુવા પોલીસ સ્ટેશનમાં ફરીયાદ નોંધવામાં આવી છે. મંજુરી સાથેના લગ્નમાં 100થી વધુ લોકોની હાજરી સામે આવતા ફરીયાદ નોધવામાં આવી છે.
વડઝર ગામના મહિલા સરપંચના પુત્રના 30 નવેમ્બરના લગ્ન યોજાયા હતા. જેમાં ગીતા રબારીની ઉપસ્થિતિમાં યોજાયેલા ડાયરાનો વિડીયો વાયરલ થયા બાદ પોલીસે કાર્યવાહી કરી હતી. પોલીસે વડઝર ગામના મહિલા સરપંચના પતિ પૃથ્વીરાજ સિંહ સોઢા સામે ડિઝાસ્ટર એક્ટની કલમ 51-બી, એકેડમીક એક્ટની કલમ 3, GPA એક્ટ 139 અને કલમ 269-270 મુજબ ફરીયાદ નોંધવામાં આવી છે. માનકુવા પોલીસે ફરીયાદ નોંધી વધુ તપાસ હાથ ધરી છે. તપાસ દરમિયાન ગીતા રબારી સહીત અન્ય લોકોની બેદરકારી અંગે પણ તપાસ કરાશે.
મહત્વનું છે કે, કોરોનાથી બચવાની શિખામણો આપનારા સિંગર કિંજલ દવે બાદ હવે ગીતા રબારીએ પણ માસ્ક અને સોશિયલ ડિસ્ટન્સને જાળવ્યા વગર ટોળેટોળા ભેગા કરી કોરોના વાયરસને સામેથી આમંત્રણ આપવાનું શરૂ કર્યુ છે. ગુજરાત સરકારે આવા કલાકારોને કોરોના જંગમાં બ્રાન્ડ એમ્બેસેડર તરીકે પસંદ કર્યા હતા. ત્યારે તેમની પાછળ પ્રજાના ટેક્સમાંથી ખર્ચેલા કરોડો રૂપિયા પાણીમાં ગયા છે.