મુશળધાર / ગુજરાત-રાજસ્થાન સહિત ઘણા રાજ્યોમાં વરસાદની સંભાવના, હવામાન વિભાગે જારી કર્યું એલર્ટ

સપ્ટેમ્બર મહિનામાં પણ વરસાદ એવો જ કહેર વરસાવી રહ્યો છે કે જાણે હજુ ચોમાસું આવી રહ્યું હોય. હાલમાં દેશના ઘણા ભાગોમાં ભારે વરસાદ પડી રહ્યો છે અને હવામાન વિભાગે 18 સપ્ટેમ્બરે ઘણા રાજ્યોમાં વરસાદનું એલર્ટ જાહેર કર્યું છે. ત્યારે છેલ્લા લેત્લાક કલાકોમાં દિલ્હી, ઉત્તર પ્રદેશ, મધ્યપ્રદેશ, હરિયાણા અને રાજસ્થાન સહિત અનેક રાજ્યોમાં થયેલા ભારે વરસાદને કારણે જનજીવન અસ્તવ્યસ્ત થઈ ગયું છે. યુપીના પ્રયાગરાજમાં છેલ્લા 36 કલાકથી વરસાદ પડી રહ્યો છે. જેના કારણે તંત્રે શાળાઓ બંધ રાખવાનો નિર્ણય લીધો છે. તો મધ્યપ્રદેશમાં પણ વરસાદે ભારે તબાહી મચાવી છે. અનેક જિલ્લાઓમાં ભારે વરસાદને કારણે જનજીવન ખોરવાઈ ગયું છે. તો રીવામાં મુશળધાર વરસાદને કારણે વહીવટીતંત્રે 18 સપ્ટેમ્બરે શાળાઓમાં રજા જાહેર કરી છે.

હવામાન વિભાગે આગાહી કરી છે કે ઉત્તર પ્રદેશ, ઉત્તરાખંડ, હરિયાણા, દિલ્હી અને રાજસ્થાન સહિત અનેક રાજ્યોમાં ભારે વરસાદની સંભાવના છે. IMD અનુસાર ચક્રવાતી તોફાન 'યાગી'ના અવશેષોને કારણે દેશના ઉત્તર-પશ્ચિમ ભાગોમાં ભારે વરસાદ થઈ શકે છે. IMD અનુસાર, દિલ્હીમાં વરસાદી સિસ્ટમ સક્રિય થઈ ગઈ છે, જેના કારણે આગામી દિવસોમાં દિલ્હી-NCRમાં ભારે વરસાદ જોવા મળી શકે છે. હવામાન વિભાગના જણાવ્યા અનુસાર, ઝારખંડમાં સક્રિય થયા બાદ ચક્રવાતી તોફાન યાગીના અવશેષો ઉત્તર-પશ્ચિમ તરફ ઝડપથી આગળ વધવાની આશંકા છે, જેના કારણે બુધવારે દિલ્હી અને મધ્યપ્રદેશ સહિત કેટલાક રાજ્યોમાં સારો વરસાદ થવાની સંભાવના છે.

આ રાજ્યો માટે જાહેર કર્યું યલો એલર્ટ

IMD એ ઉત્તરાખંડ, હરિયાણા, ચંદીગઢ, પશ્ચિમી ઉત્તર પ્રદેશ, પૂર્વ રાજસ્થાન, પશ્ચિમ મધ્ય પ્રદેશ, નાગાલેન્ડ, મણિપુર, મિઝોરમ, ત્રિપુરા અને આંદામાન અને નિકોબાર માટે યલો એલર્ટ જાહેર કર્યું છે. આ રાજ્યોમાં વરસાદ સંબંધિત સંભવિત જોખમોનો સામનો કરવા માટે વહીવટીતંત્રને તૈયાર રહેવાની સૂચના આપવામાં આવી છે. તો સાથે જ આજે 18 સપ્ટેમ્બરથી હિમાચલ પ્રદેશમાં ચોમાસુ ફરી વેગ પકડે તેવી શક્યતા છે. 18 સપ્ટેમ્બરે હિમાચલના કેટલાક જિલ્લાઓમાં ગાજવીજ અને વીજળીના ચમકારા સાથે વરસાદની ચેતવણી જારી કરવામાં આવી છે.

આગામી બે દિવસ માટે વરસાદનું એલર્ટ

હવામાન વિભાગે 18 સપ્ટેમ્બર (બુધવાર) માટે દિલ્હીમાં વાવાઝોડા સાથે હળવાથી મધ્યમ વરસાદ માટે યલો એલર્ટ જારી કર્યું છે. બુધવારે પણ 25-35 કિમી પ્રતિ કલાકની ઝડપે સપાટી પરના પવનની અપેક્ષા છે. ગયા સપ્તાહની શરૂઆતમાં, IMD એ આવતા અઠવાડિયે પશ્ચિમ અને મધ્ય ભારતના ભાગોમાં હળવાથી મધ્યમ વરસાદની આગાહી કરી હતી. દિલ્હીમાં આગામી બે દિવસ સુધી વરસાદની સંભાવના છે.

આ પણ વાંચો: મોદી સરકાર લોન્ચ કરશે NPS વાત્સલ્ય યોજના, નાની રકમનું રોકાણ તમને બનાવશે કરોડપતિ

આ રાજ્યોમાં વરસાદ પડશે

IMD મુજબ, કોંકણ અને ગોવામાં એકદમ વ્યાપકથી મધ્યમ વરસાદની શક્યતા છે, મધ્યપ્રદેશ અને છત્તીસગઢમાં હળવાથી મધ્યમ વરસાદની શક્યતા છે, અને છૂટાછવાયા સ્થળોએ હળવાથી મધ્યમ વરસાદની શક્યતા છે. સપ્તાહ દરમિયાન વિદર્ભ, મધ્ય મહારાષ્ટ્ર, મરાઠવાડા અને ગુજરાતમાં પણ વરસાદની શક્યતા છે. IMDએ જણાવ્યું હતું કે 18 સપ્ટેમ્બરે પશ્ચિમ મધ્ય પ્રદેશમાં અલગ-અલગ સ્થળોએ ભારે વરસાદની સંભાવના છે. ભારતીય હવામાન વિભાગે 14 સપ્ટેમ્બરના રોજ જણાવ્યું હતું કે ગંગાના પશ્ચિમ બંગાળ અને તેની નજીકના બાંગ્લાદેશ પર ડીપ ડિપ્રેશન યથાવત છે. IMD અનુસાર, 18 થી 20 સપ્ટેમ્બર દરમિયાન આસામ અને મેઘાલયમાં ભારે વરસાદની સંભાવના છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ