દેશ / હવામાનમાં ફરી પલટો: બિહાર અને રાજસ્થાનમાં વરસાદની આગાહી, મહારાષ્ટ્ર-એમપીમાં કરા પડશે

• હવામાનમાં ફરી થશે પલટો
• કેટલાક રાજ્યોમાં કરા સાથે પડી શકે છે વરસાદ
• દક્ષિણ પશ્ચિમમાં કરા સાથે વરસાદની આગાહી

દેશનાં મોટા ભાગનાં રાજ્યમાં ગરમીનો પારો હવે ઊંચે ચઢી રહ્યો છે જેના કારણે લોકોને આગામી દિવસોમાં કાળઝાળ ગરમીનો સામનો કરવો પડશે. બીજી તરફ વેસ્ટર્ન ડિસ્ટર્બન્સના કારણે પહાડી રાજ્યોમાં વરસાદ થવાની સંભાવના છે. એક તરફ કેટલાંક રાજ્યમાં તાપમાન વધી રહ્યું છે ત્યારે બિહાર અને રાજસ્થાનમાં વરસાદની આગાહી છે તો મહારાષ્ટ્ર અને મધ્યપ્રદેશમાં કરા પડે તેવી આગાહી છે. આમ દેશના વાતાવરણમાં વારંવાર પલટો આવી રહ્યો છે. પૂર્વ મધ્ય પ્રદેશ, તેલંગાણા અને   ઉત્તર આંધ્ર પ્રદેશમાં પણ ડબલ સાયક્લોનિક સર્ક્યુલેશન સર્જાય તેવી શક્યતા છે.

રાજધાની દિલ્હીમાં ગરમીથી હાલ બેહાલ
રાજધાની દિલ્હીમાં પણ વધતી જતી ગરમીથી લોકોના હાલ બેહાલ છે. ગઈ કાલે દિલ્હીનું તાપમાન ૩૫ ડિગ્રી સુધી પહોંચ્યું હતું. તે સિઝનનો અત્યાર સુધીનો સૌથી ગરમ દિવસ હતો. તેમાં રાહત રૂપે આજે દિલ્હીમાં વાદળછાયું વાતાવરણ રહેશે અને મહત્તમ તાપમાન ૩૪ ડિગ્રી સેલ્સિયસની આસપાસ રહેવાની આગાહી છે. જોકે આવતી કાલે દિલ્હીમાં હળવો વરસાદ થવાની પણ સંભાવના છે 

દક્ષિણ પશ્ચિમમાં કરા સાથે વરસાદની આગાહી
જ્યારે બિહાર અને રાજસ્થાનમાં આગામી થોડા દિવસમાં વરસાદની સંભાવના છે. હવામાન વિભાગના જણાવ્યા અનુસાર જમ્મુ-કાશ્મીરમાં હવામાન સામાન્ય રહેશે. જયારે દક્ષિણ પશ્ચિમના કેટલાક ભાગમાં કરા સાથે વરસાદની આગાહી કરવામાં આવી છે. ઉત્તર પ્રદેશ અને બિહારમાં મોટા ભાગનાં શહેરમાં તાપમાન સામાન્ય રહેશે, જયારે રાજસ્થાનમાં ગાજવીજ સાથે વરસાદ તેમજ તેમજ મહારાષ્ટ્ર અને ગુજરાતમાં પણ વાદળછાયા વાતાવરણ સાથે વરસાદ થવાની સંભાવના છે.

જમ્મુ-કાશ્મીરમાં હવામાન સામાન્ય
હવામાન વિભાગ અનુસાર જમ્મુ અને કાશ્મીરમાં આગામી ૨૪ કલાક દરમિયાન આકાશ સ્વચ્છ અથવા આંશિક વાદળછાયું વાતાવરણ રહેવાની સંભાવના છે. છેલ્લા ૨૪ કલાક દરમિયાન જમ્મુ- શ્રીનગરમાં લઘુતમ તાપમાન ૪.૨, પહેલગામમાં ૦.૬ અને ગુલમર્ગમાં ૨.૨ હતું. લદ્દાખ ક્ષેત્રના દ્રાસ શહેરમાં લઘુતમ તાપમાન માઈનસ ૧૧.૬ અને લેહમાં માઈનસ ૩.૬ ડિગ્રી રહ્યું હતું.