હિટવેવ / ગરમીમાં શેકાવા તૈયાર થઇ જાઓ, દેશનાં આ વિસ્તારોમાં તાપમાનનો પારો જશે આસમાને, હવામાન વિભાગની ચેતવણી

• ગરમીને લઇને હવામાન વિભાગની આગાહી
• દેશનાં ઘણાં ભાગોમાં ભીષણ લૂ લાગવાની શક્યતા
• કેરળ અને લક્ષદ્વીપમાં અલગ-અલગ સ્થળોએ વરસાદની શક્યતા

આજે માર્ચ મહિનાનો છેલ્લો દિવસ છે અને ઉત્તર ભારતના ઘણાં વિસ્તારોમાં સૂર્ય અગ્નિગોળા વરસાવવા લાગ્યો છે. એટલે કે ઘણી જગ્યાએ મે-જૂન જેવી ગરમીનો અનુભવ થવા લાગ્યો છે. ગરમ પવનોના કારણે લોકોનું જીવન ખૂબ જ મુશ્કેલ બની ગયું છે. ત્યારે હવામાન વિભાગનું (IMD) કહેવું છે કે, દેશના ઘણાં ભાગોમાં ભીષણ લૂ લાગવાની સંભાવના છે. ત્યારે ગુરુવારે રાજધાની દિલ્હી અને તેની આસપાસના અનેક વિસ્તારોમાં હિટવેવ શરૂ થઇ શકે છે. તાપમાનનો પારો 40 ડિગ્રીને પાર જઇ શકે છે. જ્યારે લઘુત્તમ તાપમાન 20 ડિગ્રી સેલ્સિયસ રહેશે તેવું અનુમાન સેવાઇ રહ્યું છે.

31 માર્ચ અને 1 એપ્રિલના રોજ મધ્યપ્રદેશ, ઝારખંડ, મહારાષ્ટ્ર અને ઓડિશામાં હિટવેવની સ્થિતિ પ્રવર્તશે

ભારતીય હવામાન વિભાગે પશ્ચિમ અને પૂર્વ રાજસ્થાન, પશ્ચિમ યુપીના ભાગો અને મધ્યપ્રદેશના પશ્ચિમ ભાગોમાં ભીષણ લૂ લાગવાની આગાહી કરી છે. એ સિવાય દક્ષિણ હરિયાણા, દિલ્હી અને હિમાચલના ભાગોમાં પણ હિટવેવ જેવી સ્થિતિ સર્જાઈ શકે છે. જો કે, શુક્રવારથી આગામી બે દિવસ સુધી કેટલીક જગ્યાએ થોડાંક સમય માટે રાહતની આશા કરી શકાય છે. હવામાન વિભાગે એવી આગાહી કરી છે કે, 31 માર્ચ અને 1 એપ્રિલના રોજ મધ્યપ્રદેશ, ઝારખંડ, મહારાષ્ટ્ર અને ઓડિશામાં હિટવેવની સ્થિતિ પ્રવર્તશે.

આગામી 5 દિવસ સુધી સૌરાષ્ટ્ર કચ્છનાં પૂર્વ વિસ્તારોને લૂથી થશે ભારે પરેશાની

છત્તીસગઢ, મરાઠવાડા અને તેલંગાણામાં 2જી એપ્રિલ સુધી લૂ લાગવાની સ્થિતિ યથાવત રહેવાની શક્યતા છે. આગામી 5 દિવસ સુધી મધ્યપ્રદેશ અને સૌરાષ્ટ્ર કચ્છનાં પૂર્વ વિસ્તારોને લૂથી ભારે પરેશાની થશે. સ્કાયમેટનાં જણાવ્યાં અનુસાર, પંજાબ, હરિયાણા અને આસપાસના વિસ્તારોમાં ડ્રાય સાયક્લોનિક સર્ક્યુલેશન ચાલુ છે, જેના કારણે આ વિસ્તારોમાં ગરમી સતત વધી રહી છે. છેલ્લાં 24 કલાક દરમિયાન પશ્ચિમ રાજસ્થાન અને પૂર્વ રાજસ્થાનના કેટલાંક ભાગોમાં તીવ્ર ગરમીની સ્થિતિ જોવા મળી રહી છે.

કેરળ અને લક્ષદ્વીપમાં અલગ-અલગ સ્થળોએ હળવાથી મધ્યમ વરસાદની શક્યતા

હવામાન શાસ્ત્રીઓનાં મતે, નીચલા સ્તરો પર વિદર્ભથી કેરળ અને આંતરિક કર્ણાટક સુધી એક ટ્રફ રેખા બની ગઇ છે. જેનાં કારણે કેરળ અને લક્ષદ્વીપમાં અલગ-અલગ સ્થળોએ હળવાથી મધ્યમ વરસાદની શક્યતા છે. દક્ષિણ તટીય કર્ણાટક, આંદામાન અને નિકોબારના કેટલાંક ભાગોમાં હળવાથી મધ્યમ વરસાદ પડી શકે છે. એ સિવાય આસામ-મેઘાલય અને અરુણાચલમાં પણ કેટલીક જગ્યાએ ભારે વરસાદ થવાની સંભાવના છે.