VIDEO: હિટવેવ મામલે હવામાન વિભાગે કરી આગાહી જાણો શું

કચ્છમાં ઉનાળાની આકરી શરૂઆત થઇ ચુકી છે. છેલ્લાં થોડા દિવસથી લગાતાર ગરમીનો પારો રોજે રોજ ઉપર ચઢી રહ્યો છે. આજે જિલ્લા મથક ભુજ અને કંડલા એરપોર્ટ ખાતે દિવસના મહત્તમ તાપમાનનો પારો 39 ડિગ્રીને પાર પહોંચી ગયો છે. ત્યારે હવામાન વિભાગ દ્વારા આગામી દિવસોમાં કચ્છમાં હિટવેવની આગાહી કરવામાં આવી છે.

ઉલ્લેખનીય છે કે વાતાવરણમાં આકાશમાંથી વરસી રહેલી અગનવર્ષાના કારણે લોકોએ ઘર બહાર પગ મુકવાનું ટાળ્યું હતું. ભુજ અને કંડલા એરપોર્ટ (ગળપાદર) ખાતે આજે મહત્તમ તાપમાન 39 ડિગ્રી સેલ્સિયસ નોંધાયું છે. જયારે નલિયામાં પારો 38.5 સેલ્સિયસ પર અટક્યો હતો. એકાએક વધેલી ગરમીની તીવ્રતા દર્શાવે છે. 

આ સાથે ગાંધીધામ-કંડલા સંકુલમાં પણ તાપમાનનો પારો ઊંચકાયો છે. કંડલા એરપોર્ટ કેન્દ્ર ખાતે ત્રણ દિવસ દરમિયાન પારો 4 ડિગ્રી ઊપર ચઢ્યો છે. વાતાવરણમાં ભેજનું નહિંવત પ્રમાણ હોઈ લોકોએ લૂનો અહેસાસ કર્યો હતો.

દિવસના તાપમાન સાથે રાત્રિનું લઘુત્તમ તાપમાન પણ ઊંચકાઈને 21 ડિગ્રીને પાર થઈ ગયું છે. ત્યારે હવામાન વિભાગ દ્વારા આગામી દિવસોમાં હિટવેવની આગાહી કરતા લોકોને અંગ દઝાડતી ગરમી પડવાની શક્યતા છે.