..તો આજે ફરીવાર થઇ શકે મેઘ મહેર હવામાન ખાતાએ વરસાદ અંગે કરી આગાહી

અમદાવાદ: હવામાન વિભાગે વરસાદની આગાહી કરી છે. દક્ષિણ અને મધ્ય ગુજરાતમાં વરસાદ પડી શકે છે. 22 સપ્ટેમ્બરના રોજ વરસાદ પડવાની શક્યતાઓ છે. છોટા ઉદેપુર નર્મદા વડોદરા જિલ્લામાં વરસાદની સંભાવના છે.

તો આ તરફ ભરૂચ સુરત જિલ્લામાં પણ વરસાદ થઇ શકે છે. ડિપ્રેશનની સિસ્ટમ આગળ વધી રહી છે. ગુજરાતની આસપાસ 1 સિસ્ટમ સક્રિય થઈ છે. જેના કારણે દક્ષિણ ગુજરાત અને મધ્ય ગુજરાતમાં સામાન્ય વરસાદ પડવાની આગાહી કરવામાં આવી છે.

ઉલ્લેખનીય છે કે ગુજરાતમાં ઘણી વાટ જોવડાવ્યા બાદ મેઘરાજા મહેરબાન થતાં જળાશયો છલકાયા છે. ગુજરાતમાં વરસાદના બીજા રાઉન્ડથી ડેમોમાં પાણીની આવક થઈ છે. કુલ 203 જળાશયોમાં 219676 MCFT પાણીનો સંગ્રહ થયો છે. જળાશયોની કુલ સંગ્રહ શક્તિના 39.47 ટકા પાણીનો સંગ્રહ થયો છે.જો કે ફરીવાર  નર્મદા ડેમની સપાટીમાં ઘટાડો થયેલો પણ નોંધાયો છે.

ઉત્તર ગુજરાતના 15 ડેમમાં 32.59 ટકા પાણીનો સંગ્રહ થયો છે. તો મધ્ય ગુજરાતના 17 જળાશયોમાં 53.99 ટકા અને દક્ષિણ ગુજરાતના 13 જળાશયોમાં 36.73 ટકા પાણીનો સંગ્રહ થયો છે અને સૌરાષ્ટ્રના 138 જળાશયોમાં 44.30 ટકા પાણીના જથ્થાનો સંગ્રહ થયો છે.  

આપને જણાવી દઇએ કે એક તરફ કેરળમાં કુદરતે કાળો કહેર વરસાવ્યો છે ભારે વરસાદને લઇને જનજીવન અસ્ત વ્યસ્ત થઇ ગયું છે તો કેટલાય લોકોએ પોતાના જીવ ગુમાવ્યા છે. કેરળમાં જોવા મળેલ મેઘરાજાના પ્રકોપને લીધે કેટલાય જિલ્લાઓ પાણીમાં ગરકાવ થઇ ગયા છે ત્યારે ગુજરાતના વરસાદને લઇને હવામાન વિભાગે મોટી આગાહી કરી છે.