જૂનાગઢ જિલ્લામાં પડી રહેલા ધમાકેદાર વરસાદને કારણે માણાવદર તાલુકાનું ઈન્દ્ર ગામ બેટમાં ફેરવાઈ ગયું છે. ઉપરવાસના વરસાદને કારણે વરસાદી પાણી ગામમાં ઘૂસી ગયા છે. જેથી વાહન વ્યવહાર ઠપ્પ થઈ ગયો છે. જૂનાગઢ જિલ્લાના માંગરોળના ઘેડ વિસ્તારમાં ભારે વરસાદના કારણે ખેતરોમાં પાણી ભરાયા છે.
ઉલ્લેખનીય છે કે ઓઝત નદીના પાણી ગામોમા ઘુસી જતા લોકોને ભારે હાલાકીનો સામનો કરવો પડી રહ્યો છે. સરમા ઘોડાસર ફૂલરામા ભાથરોડ સહીતના ગામો બેટમાં ફેરવાયા છે. જૂનાગઢના માણાવદરમાં છેલ્લા 4 કલાકમાં 8 ઈંચ જેટલો વરસાદ વરસ્યો છે. ભારે વરસાદના કારણે સ્કૂલમાં પાણી ભરાયુ છે અનેક રસ્તાઓ પર પણ પાણી ભરાયા છે. માણાવદરનો રસાલા ડેમ પણ ઓવરફ્લો થયો છે. જેથી આસપાસના ગામોને પણ એલર્ટ કરવામાં આવ્યા છે.
આપને જણાવી દઇએ કે આ સાથે જ જૂનાગઢ જિલ્લાના વંથલી તાલુકાનું ટીનમસ ગામ સંપર્ક વિહોણું બન્યું છે. ગામમાં ઉપરવાસમાં પડેલા ભારે વરસાદના કારણે પાણી ગામમાં આવતા સંપર્ક ખોરવાયો છે. જેને લઈને નીચાણવાળા વિસ્તારોમાંથી સુરક્ષિત સ્થળે ખસેડાયા હતા.
ગામમાં ભારે વરસાદને પગલે એક યુવક પાણીમાં તણાયો હતો. જોકે ગ્રામજનોના પ્રયાસથી યુવકને બચાવી લેવામાં આવ્યો છે. આ સમગ્ર મામલે સરકાર કે તંત્ર દ્વારા ગ્રામમાં કોઈ પણ પ્રકારની કામગીરી કરવામાં ન આવતા ગ્રામજનો ફિટકાર વરસાવી રહ્યાં છે.