ગાંધીનગર: રાજ્યભરમાં વહેલી સવારથી જ મેઘરાજા મહેરબાન બન્યા છે. રાજ્યના 30 જિલ્લાઓમાં એકંદરે ખુબ સારો વરસાદ પડ્યો છે. જેના કારણે ખેડૂતોમાં ખુશીનું મોજું ફરીવળ્યું છે. જો કે શહેરી વિસ્તારોમાં ભારે વરસાદના કારણે પાણી ભરાયાના દ્રશ્યો જોવા મળ્યા હતા. રાજ્યના 209 તાલુકાઓમાં સાર્વત્રિક વરસાદ જોવા મળ્યો.
જેમાં 6 તાલુકાઓમાં 4 ઈંચથી પણ વધુ વરસાદ ખાબક્યો છે. જ્યારે 36 તાલુકાઓમાં 2 થી 4 ઈંચ અને 64 તાલુકામાં 1થી 2 ઈંચ જેટલો વરસાદ પડ્યો પડ્યો છે. હવામાન વિભાગ દ્વારા પણ આગામી 24 કલાકમાં રાજ્યમાં સારા વરસાદની આગાહી આપવામાં આવી છે.
ખાસ કરીને દક્ષિણ અને ઉત્તર ગુજરાતમાં ભારે વરસાદ પડવાની શયતા છે. જો કે વરસાદની આગાહીના પગલે રેસ્ક્યુ ટીમોને પણ અલર્ટ રાખવામાં આવી છે. જેથી કરીને મુશ્કેલીની કોઈપણ ઘડીમાં લોકોનો બચાવ કરી શકાય.
ઉલ્લેખનીય છે કે રાજ્યમાં આવનાર દિવસોમાં ભારે વરસાદની સ્થિતિને જોતા હાલની NDRFની 5 ટીમોને એલર્ટ કરી દેવામાં આવી છે. હાલ રાજ્યમાં વલસાડ નવસારી રાજકોટ ગોધરા તથા પાટનગર ગાંધીનગરમાં NDRFની ટીમો તૈનાત છે.
જેમા વધુ 2 ટીમોનો ઉમેરો થશે જે પાલનપુર અને પાટનગર ગાંધીનગરમાં તૈનાત રહેશે. દક્ષિણ ગુજરાતમાં વરસાદની સાથે 2 વ્યક્તિઓ ગીરા ધોધમાં તણાયાના સમાચાર મળતા શોધખોળ હાથ ધરવામાં આવી હતી.
આપને જણાવી દઇએ કે છેલ્લા 24 કલાક દરમિયાન પડેલા વરસાદના કારણે પંચાયત વિભાગના 34 રસ્તાઓ બંધ છે. જ્યારે 81 ગામોમાં વીજળી ગૂલ થઈ હતી જેમાંથી 18 ગામોમાં વીજળીનો પુરવઠો પૂર્વવત કરવામાં આવ્યો છે જ્યારે 63 ગામોમાં વીજળી પૂર્વવત કરવા માટે કામગીરી હાથ ધરાઈ છે.
આ તરફ રાજ્યના જળાશયોની વાત કરવામાં આવે તો 203 જળાશયો માંથી 100 ટકા ભરાયેલા જળાશયોનો આંકડો 12 છે જ્યારે 70 ટકાથી 100 ટકા 29 જળાશયો 50 થી 70 ટકા 25 જળાશયો 25 થી 50 ટકા 50 જળાશયો જ્યારે 25 ટકાથી ઓછો પાણીનો જથ્થો હોય તેવા 87 જળાશયો છે જેમાં 36.45 ટકા કૂલ પાણીનો જથ્થો છે. જ્યારે સરદાર સરોવર નર્મદા ડેમમાં 39 ટકા પાણી એટલે 3 771 MCM (મિલિયન ક્યુબીક મીટર) પાણી નો જથ્થો છે.