...તો આગામી 2 દિવસમાં થઇ શકે મેઘ મહેર હવામાન ખાતાની મોટી આગાહી

ગાંધીનગર: રાજ્યમાં આગામી બે દિવસમાં મધ્યમથી ભારે વરસાદ વરસી શકે છે. હવામાન વિભાગની આગાહી પ્રમાણે બંગાળની ખાડીમાં લો પ્રેશર સર્જાયું છે. જેના કારણે આગામી બે દિવસમાં રાજ્યમાં મધ્યમથી ભારે વરસાદ થઈ શકે છે.

તો આ તરફ જામનગરના જોડિયા તાલુકા અને પંથકમાં સતત બીજા દિવસે વરસાદ વરસી રહ્યો છે. અડધા ઈંચથી 2 ઇંચ વરસાદ પડયો હતો. સાથે દરિયાઈ પટ્ટીમાં પણ વરસાદી જોરનું વાતાવરણ છે. જોડિયા બાલંભા ઊંટબેટ સામપર સહિતના ગામડાઓમાં વરસાદ પડયો છે. વરસાદ પડતા લોકો અને ખેડૂતોમાં ખુશીનો માહોલ છવાયો છે. 

ઉલ્લેખનીય છે કે વરસાદને કારણે સરદાર સરોવર નર્મદા ડેમની સપાટીમાં ધરખમ વધારો થયો છે. ઉપરવાસમાંથી સતત પાણીની આવક થતાં નર્મદા ડેમની સપાટીમાં વધારો થયો છે. ઉપરવાસમાંથી 53573 કયુસેક પાણીની આવક થઈ છે.



ડેમની હાલની સપાટી 120.29 મીટર છે. ડેમની સપાટી  120.29 મીટર થતા ડેમના પાવર હાઉસ ચાલુ કરવામાં આવશે. ડેમમાં 127.54 MCM લાઈવ સ્ટોરેજ પાણીનો જથ્થો છે. 

આપને જણાવી દઇએ કે રાજ્યમાં ઠેર-ઠેર છેલ્લા 24 કલાકમાં અડધાથી 2 ઈંચ જેટલો વરસાદ વરસ્યો છે..દક્ષિણ ગુજરાત અને સૌરાષ્ટ્રના તાલુકામાં ધીમીધારે વરસાદ થઈ રહ્યો છે. વલસાડ ડાંગ સુરત ભાવનગરમાં વરસાદ વરસ્યો છે.

ઉમરપાડામાં બે ઈંચ તો ધરમપુર અને ડાંગના વઘઈમાં દોઢ ઈંચ વરસાદ વરસ્યો છે. તો આ તરફ ભાવનગરના મહુવા અને સુરતમાં એક-એક ઈંચ અને વાંસદા શિહોર લાઠી ગઢડામાં અડધો-અડધો ઈંચ વરસાદ થયો છે.