રાજ્યભરમાં આગામી 24 કલાકમાં ભારેથી અતિભારે વરસાદની હવામાન વિભાગ દ્વારા આગાહી કરવામાં આવી છે. ખાસ કરીને સૌરાષ્ટ્ર અને દક્ષિણ ગુજરાતમાં ધોધમાર વરસાદ પડવાની સંભાવના છે. આ તરફ ઉત્તર અને મધ્ય ગુજરાતમાં પણ વરસાદ પડવાની શક્યતા છે.
હવામાન વિભાગના જણાવ્યા પ્રમાણે સમગ્ર ગુજરાતને આંતરતી નવી સિસ્ટમ બંગાડની ખાડીમાં સક્રિય થઈ છે. જેના કારણે સમગ્ર રાજ્યમાં ધોધમાર વરસાદ પડી શકે છે. દરિયામાં સિસ્ટમ સક્રિય થતા માછીમારોને પણ દરિયો ન ખેડવા માટે સલાહ આપવામાં આવી છે.
તો તમામ બંદરોને સતર્ક રહેવાના આદેશ આપી દેવાયા છે. આ તરફ સરકારનું વહીવટી તંત્ર પણ સતર્ક થયું છે અને NDRF અને ડિઝાસ્ટર મેનેજમેન્ટ સહિતની તમામ બતાવ ટીમોને સ્ટેન્ડબાય રાખવામાં આવી છે.
આપને જણાવી દઇએ કે રાજ્યમાં 5 દિવસ ભારે વરસાદની આગાહી હવામાન વિભાગ દ્વારા કરવામાં આવી છે તો દરિયા કાંઠાના વિસ્તારોમાં ભારે પવન સાથે વરસાદ થાય તેવી શક્યતા છે.
જ્યારે ઉત્તર ગુજરાતમાં પણ સામાન્ય વરસાદ વરસે તેવી શક્યતા રહેલી છે. રાજ્યમાં વરસાદની આગાહીને પગલે તંત્રને એલર્ટ કરાયું. 17 અને 18 જૂલાઈએ અમદાવાદમાં મધ્યમ વરસાદની આગાહી હવામાન વિભાગે કરી છે.
ઉલ્લેખનીય છે કે આ તરફ નવસારી જિલ્લામાં વરસાદ વિરામ લેવાનું નામ નથી લઈ રહ્યો. બારે મેઘ ખાંગા થયા છે. ભારે વરસાદના પગલે અંબિકા અને કાવેરી નદી બેફામ રીતે વહી રહી છે.જેના કારણે ગણદેવી તાલુકાના 28 જેટાલા ગામોને અલર્ટ કરાયા છે.
તો બીજી તરફ વાંસદા તાલુકામાં આવેલા જૂજ અને કેલીયા ડેમ ગણતરીની કલાકોમાં જ ઓવરફ્લો થવાની સ્થિતિમાં છે. જેને લઈને પણ નદી કાંઠાના 36 ગામડાઓને અલર્ટ આપવામાં આવ્યું છે. અનેક ગામડાઓમાં નદીઓના પાણી પણ ઘુસી ગયા છે.
જેના કારણે લોકોએ ભારે હાલાકીનો સામનો કરવો પડી રહ્યો છે. નીચાણવાળા વિસ્તારોમાં ઘરોમાં પાણી ઘૂસી ગયા છે અને હજૂ પણ પાણીનું સ્તર સતત વધતું જઈ રહ્યું છે. જેના કારણે લોકોને સ્થળાંતર કરવું પડી રહ્યું છે.