એક તરફ સૌરાષ્ટ્રના કેટલાક વિસ્તારોમાં સતત બીજા દિવસે પણ વરસાદ વરસ્યો છે. તો બીજી તરફ અમદાવાદમાં કોરોના સંકટ વચ્ચે શહેરીજનોને ગરમીનો પણ સામનો કરવો પડશે. હવામાન વિભાગે આગાહી કરતા કહ્યું કે અમદાવાદમાં 1 અને 2 મે સુધી ભારે ગરમી પડે તેવી શક્યતા છે. હવામાન વિભાગે રેડ અલર્ટ જાહેર કર્યું છે. કમોસમી વરસાદ બાદ આકરી ગરમીનું સંકટ યથાવત છે. ગરમીનો પારો 2થી 3 ડિગ્રી વધવાની શક્યતા છે. અમદાવાદમાં ગરમીનો પારો બે દિવસ 45 ડિગ્રી સુધી પહોંચે તેવી શક્યતા છે.
રાજ્યમાં કોરોનાનો કહેર
કાળઝાળ ગરમીનો પ્રકોપ
કમોસમી વરસાદનું સંકટ
રાજ્યમાં એક તરફ કોરોનાને કહેર ચાલી રહ્યો છે, બીજી તરફ કાળઝાળ ગરમીના કારણે કમોસમી વરસાદ વરસી રહ્યો છે. ત્યારે આ કમોસમી વરસાદ વરસતા ખેડૂતો ચિંતામાં મુકાયા છે. બીજા દિવસે પણ જામનગર, રાજકોટ અને અમરેલી સહિતના વિસ્તારોમાં વરસાદ ખાબક્યો છે. મહત્વનું છે કે, ગઇકાલે ગુજરાતના કેટલાક વિસ્તારોમાં કમોસમી વરસાદ વરસ્યો હતો.
અમરેલીમાં પણ સતત બીજા દિવસે વરસાદ વરસ્યો છે. જાળીયા સહિતના વિસ્તારોમાં વરસાદી ઝાપટાના કારણે ખેડૂતોમાં ચિંતાની લહેર વ્યાપી છે. બીજી તરફ જામનગરના કાલાવડ પંથકમાં છેલ્લા 4 દિવસમાં ત્રીજી વખત કમોસમી વરસાદ વરસ્યો છે. જેમાં ભંગડા, નવાગામ, માછરડા, ઉમરાળા સહિતના ગામોમાં વરસાદ વરસ્યો છે. રાજકોટના ગોંડલ સહિતના વિસ્તારમાં સતત વરસાદના કારણે પાક પલળ્યા છે. યાર્ડમાં રાખેલા મગફળી, ધાણા, ડુંગળી, મરચાનો જથ્થો પલળ્યો છે. ગઈકાલે ઉનાળુ મગફળીના રેકોર્ડ ભાવ રૂ.1500 ઉપર નોંધાયા હતા. વરસાદના કારણે પાક પલળી જતા ખેડૂતોને મોટુ નુકશાન થઈ શકે છે. અત્રે ઉલ્લેખનીય છે કે, રાજકોટ, અમરેલી, દેવભૂમિ દ્વારકા, જૂનાગઢ, જામનગર, ગીર સોમનાથ સહિતના વિસ્તારોમાં ગઇ કાલે વરસાદ વરસ્યો હતો.
હવામાન વિભાગે કમોસમી વરસાદની કરી આગાહી
આગામી બે દિવસ રાજ્યમાં ગરમી વધવાની હવામાન વિભાગે આગાહી કરી છે. કોરાનાના કહેર વચ્ચે વરસાદની હવામાન વિભાગે આગાહી કરી છે. સાયક્લોનિક સર્ક્યુલેશન સક્રિય થતા વરસાદ પડવાની આગાહી કરી છે.