હવામાન / કોરોનાની દહેશત વચ્ચે રાજ્યના આ વિસ્તારમાં કમોસમી વરસાદથી ખેડૂતોમાં પાકના નુકસાનને લઇને ચિંતા

• ખેડાના ગળતેશ્વર નજીક મોડીરાતથી વરસાદી માહોલ
• તમાકુ, ડાંગર સહિતના ઉભા પાકોને નુકસાનની ભીતિ
• ભરૂચના જંબુસરમાં વાતાવરણમાં પલટા બાદ કમોસમી વરસાદ

ગુજરાતમાં જ્યાં એકબાજુ કોરોના વાયરસનો કહેર જોવા મળી રહ્યો છે ત્યારે બીજી બાજુ ગઇકાલે અમરેલી-ધારી સહિતના ગીર-પંથકમાં વાતાવરણમાં પલટો જોવા મળ્યો હતો. આ સાથે ધારીના ગોવિંદપુર અને સુખપુરામાં કમોસમી વરસાદ પડયો હતો. 
 

અમદાવાદના પૂર્વ વિસ્તારોના વાતાવરણમાં પલટો

રાજ્યના વાતાવરણને હવામાન વિભાગની આગાહી વચ્ચે અમદાવાદ શહેરના પૂર્વ વિસ્તારના વાતાવરણમાં આજરોજ પલટો જોવા મળ્યો હતો. જેને લઇને પૂર્વના અનેક વિસ્તારોમાં કમોસમી વરસાદી માહોલ સર્જાયો. જેમાં ખોખરા-હાટકેશ્વર, CTM, અમરાઇવાડી, રામોલ, જશોદાનગર, મણિનગર, ઇસનપુરમાં વરસાદી ઝાપટા પડ્યાં છે. 

ખેડાના વાતાવરણમાં જોવા મળ્યો પલટો

હવામાન વિભાગની આગાહી વચ્ચે ખેડા જિલ્લાના વાતાવરણમાં અચાનક પલટો જોવા મળ્યો હતો. જેમાં ગતરાતથી કમોસમી વરસાદી માહોલ જોવા મળ્યો હતો. જેમાં સેવાલિયી સહિતના વિસ્તારોમાં વરસાદી ઝાપટા પડ્યાં છે. જો કે જિલ્લામાં કમોસમી વરસાદી ઝાપટાના પગલે ખેડૂતો ચિંતિત બન્યાં છે. જિલ્લામાં તમાકુ, ડાંગર સહિતના ઉભા પાકોને નુકશાનની ભીતિ છે. 
 

ભરૂચના જંબુસરના વાતાવરણમાં પલટો

રાજ્યના વાતાવરણમાં પલટાની સાથે કમોસમી વરસાદની હવામાન વિભાગની આગાહી કરવામાં આવી છે. ત્યારે ભરૂચના જંબુસરના વાતાવરણમાં પલટો જોવા મળ્યો છે. વાદળછાયા વાતાવરણ બાદ કમોસમી વરસાદી ઝાપટા પડ્યા છે. કોરોનાની દહેશત વચ્ચે વરસાદથી ખેડૂતોની ચિંતામાં વધારો થયો છે.