ગાંધીનગર: હવામાન વિભાગે રાજયમાં વાવાઝોડાની આગાહી વ્યક્ત કરી છે. હવામાન વિભાગના જણાવ્યા મુજબ અરબી સમુદ્રમાં વાવાઝોડુ સક્રિય થયું છે. જેને લઇને ગુજરાત મહારાષ્ટ્રમાં વરસાદની શકયતા વધશે.
ખાસ કરીને સમુદ્રકાંઠાના વિસ્તારોમાં ભારેથી અતિ ભારે વરસાદની શકયતા છે. ગુજરાત મહારાષ્ટ્ર મરાઠાવાડા અને કેરળમાં અતિભારે વરસાદનું અનુમાન છે. તો સાથે જ મધ્યપ્રદેશ અને કોસ્ટલ કર્ણાટકમાં વરસાદની શકયતા છે.
જો કે 3-4 દિવસ અગાઉ પણ બંગાળની ખાડીમાં નવી સિસ્ટમ સક્રિય થતાં ગુજરાતમાં બે દિવસ સુધી ભારે વરસાદ થવાની આગાહી કરવામાં આવી હતી.
ઉલ્લેખનીય છે કે ગુજરાતમાં એન્ટ્રી કરી સૌથી પહેલા દક્ષિણ ગુજરાતને ઘમરોળી નાખ્યુ છે. દક્ષિણ ગુજરાતના વાપી વલસાડ ઉમરગામ સુરત સહિતના વિસ્તારમાં મેઘરાજા એવા તો મનમૂકીને વરસ્યા કે સર્વત્ર જળબંબાકારની સ્થિતી સર્જાઇ છે. તો દક્ષિણ ગુજરાતને પાણી પાણી કર્યા બાદ મેઘરાજાની સવારી મધ્યગુજરાતમાં પણ આવી પહોંચી હતી.