હવામાન વિભાગની આગાહી મુજબ વેસ્ટર્ન ડિસ્ટર્બન્સ સર્જાતા આજે પણ રાજ્યભરમાં વરસાદ રહેશે. બે દિવસથી વરસાદી માહોલને લઇ ખેડૂતો ચિંતિત છે. આજે દક્ષિણ ગુજરાતમાં વરસાદની આગાહી છે.
આજે પણ રાજ્યમાં વરસાદી માહોલ યથાવત રહેશે
બે દિવસથી વરસાદી માહોલને લઇ ખેડૂતો ચિંતિત
આજે દક્ષિણ ગુજરાતમાં વરસાદની આગાહી
ગુજરાત પર એક તરફ કોરોના વાયરસનો કહેર તો બીજી તરફ રાજ્યમાં લગ્નની સિઝન પુરજોશમાં ચાલી રહી છે ત્યારે છેલ્લા બે દિવસથી કમોસમી વરસાદ વરસતા ખેડૂતો સાથે લગ્નવાંચ્છુકોની ચિંતામાં પણ વધારો કર્યો છે.
જો કે રાજ્ય પર હજી પણ આગામી 24 કલાક કમોસમી વરસાદને લઇને હવામાન વિભાગે આગાહી કરી છે. વેસ્ટર્ન ડિસ્ટર્બન્સને લઇને આજે દક્ષિણ ગુજરાતમાં કમોસમી વરસાદની આગાહી કરી છે. ગઇકાલે રાજ્યના મોટાભાગના જિલ્લાઓમાં કમોસમી વરસાદ જોવા મળ્યો. કમોસમી વરસાદથી ખેડૂતોને ઉભા પાકમાં નુકસાનની ભીતિ જોવા મળી રહી છે.
દક્ષિણ ગુજરાતમાં સતત 3 દિવસથી કમોસમી વરસાદ
દક્ષિણ ગુજરાતમાં આજે પણ વરસાદી માહોલ જોવા મળી રહ્યો છે. સુરત, નવસારી, તાપીમાં ધીમી ધારે વરસાદ વરસી રહ્યો છે. શિયાળાની ઠંડીની સાથે વરસાદની બેવડી ઋતુનો લોકો અનુભવ કરી રહ્યાં છે. વરસાદને લઇને શાકભાજી અને શેરડીના પાકની નુકસાન થવાની ભીતિ સેવાઇ રહી છે. જેના કારણે કમોસમી વરસાદે ખેડૂતોની ચિંતા વધારી છે. દક્ષિણ ગુજરાતમાં સતત 3 દિવસ કમોસમી વરસાદ વરસી રહ્યો છે.
નવસારીમાં સતત ત્રીજા દિવસે કમોસમી વરસાદ યથાવત્
હવામાન વિભાગની આગાહી મુજબ રાજ્યમાં છેલ્લા 48 કલાક વરસાદી માહોલ જોવા મળ્યો હતો. જેમાં સૌથી વધારે સૌરાષ્ટ્ર અને દક્ષિણ ગુજરાતના જિલ્લાઓમાં કમોસમી માવઠું જોવા મળ્યું. નવસારીમાં સતત ત્રણ દિવસથી કમોસમી વરસાદ વરસી રહ્યો છે. જેના પગલે ખેડૂતોમાં ચિંતાની લહેર જોવા મળી રહી છે. ગઇકાલે મોડી રાત્રથી ગણદેવી, ચીખલી અને ખેરગામ તાલુકામાં અંદાજે દોઢ ઇંચ જેટલો વરસાદ નોંધાયો છે.
સુરત જિલ્લામાં ગઇકાલે વરસ્યો કમોસમી વરસાદ
વેસ્ટર્ન ડિસ્ટર્બન્સના પગલે રાજ્યમાં વરસાદની આગાહીના પગલે રાજ્યના અનેક જિલ્લાના વાતાવરમણમાં પલટો જોવા મળ્યો હતો. ત્યારે સુરત જિલ્લામાં પણ કમોસમી વરસાદ વરસ્યો હતો. સુરતના ઓલપાડ, કામરેજ, બારડોલી, માંગરોળમાં છૂટો છવાયો ઝરમર વરસાદ વરસ્યો હતો. જો કે કમોસમી માવઠાના પગલે ડાંગરના પાકને નુકસાન થવાની શક્યતા છે.
વલસાડ જિલ્લામાં સતત બીજા દિવસે વાતાવરણમાં પલટો
વલસાડ જિલ્લામાં છેલ્લા બે દિવસથી સતત કમોસમી વરસાદ વરસી રહ્યો હતો. ગઇકાલે વહેલી સવારથી વરસાદી ઝાપટું પડતા ધરતી પુત્રોમાં ચિંતાનો માહોલ જોવા મળ્યો હતો. કેરી, કઠોળ અને શાકભાજીના પાકને નુકસાન થવાની શક્યતા છે.
તાપી જિલ્લામાં ગઇકાલે કમોસમી વરસાદ વરસ્યો
હવામાન વિભાગની આગાહીના પગલે છેલ્લા 48 કલાકથી તાપી જિલ્લામાં વરસાદી માહોલ જોવા મળી રહ્યો છે. જિલ્લાના ગ્રામ્ય વિસ્તારોમાં કમોસમી વરસાદી માવઠું વરસ્યું હતું. જેમાં વ્યારા, વાલોડ, ડોલવણ તાલુકામાં ઝરઝરમ વરસાદે ખેડૂતોની ચિંતામાં વધારો કર્યો હતો.