હવામાન વિભાગ દ્વારા આગામી 24 કલાકમાં ગુજરાતના કેટલાક જિલ્લામાં વરસાદ થવાની આગાહી કરવામાં આવી છે. ત્ચારે રાજ્યના હવામાન નિષ્ણાત અંબાલાલ પટેલે પણ વરસાદને લઇને જણાવ્યું હતું કે, આગામી ઓક્ટોબર માસ સુધી ગુજરાતમાં વરસાદી વાતાવરણ જોવા મળી શકે છે.
અંબાલાલ પટેલની વરસાદ અંગે આગાહી
5 ઓક્ટોબર સુધી રહી શકે વરસાદી વાતાવરણ
ઉલ્લેખનીય છે કે, રાજસ્થાન અને પશ્ચિમી મધ્યપ્રદેશમાં ભારે વરસાદની આગાહી કરવામાં આવી છે. તો ગુજરાતમાં આજે અને આવતીકાલે વરસાદ વરસશે. જ્યારે સૌરાષ્ટ્ર, ઉત્તર ગુજરાત અને મધ્યગુજરાતમાં વરસાદની સંભાવના સેવાઈ રહી છે.
રાજ્યમાં લંબાઇ શકે છે ચોમાસું
હવામાન નિષ્ણાત અંબાલાલ પટેલ દ્વારા વરસાદને લઇને આગાહી કરવામાં આવી છે. અંબાલાલ પટેલે ગુજરાતના વરસાદ અંગે જણાવ્યું હતું કે, રાજ્યમાં ચોમાસું લંબાવાની શક્યતા છે. આ સાથે જ 5 ઓક્ટોબર સુધી રાજ્યમાં ઠેર-ઠેર છૂટોછવાયો વરસાદ પણ પડી શકે છે.
ઓક્ટોબરમાં પણ વરસાદી માહોલ
અંબાલાલ પટેલે VTV સાથે વાતચીત કરતા જણાવ્યું કે, વરસાદી સિસ્ટમ બનશે તો 5 ઓક્ટોબર સુધી વરસાદ રહેશે. તો આ સાથે જ ઓક્ટોબર સુધી રાજ્યમાં વરસાદી માહોલ યથાવત રહેવાની શક્યતા છે.
મધ્ય ગુજરાતના વરસાદ અંગે વાત કરતા હવામાન નિષ્ણાત અંબાલાલ પટેલે કહ્યું કે, અમદાવાદ, ગાંધીનગર, આણંદમાં પણ છૂટાછવાયો વરસાદ થવાના એંધાણ છે. તો આ સાથે જ રાજ્યના હવામાન ખાતાએ પણ ઠેર-ઠેર વરસાદ થવાની આગાહી કરેલ છે.
સૌરાષ્ટ્રમાં મધ્યમથી ભારે વરસાદ
ઉત્તર ગુજરાતના વિસ્તારમાં દિવસભર છૂટો છવાયો વરસાદ રહેશે. જેમાં અમદાવાદ સહિત ઉત્તર ગુજરાતના વિસ્તારોમામ મોડી રાતથી જ ઝરમર વરસાદ શરૂ થઈ ગયો છે. સૌરાષ્ટ્રના જિલ્લાઓમાં મધ્યમથી ભારે વરસાદની શક્યતા છે.
નર્મદા ડેમની સપાટીમાં થઇ રહ્યો છે વધારો
સરદાર સરોવર નર્મદા ડેમની સપાટીમાં વધારો થઈ રહ્યો છે. નર્મદા ડેમની સપાટી વધીને 138.33 મીટરે પહોંચી છે. ડેમમાં દર કલાકે સતત એક સેન્ટીમીટરનો વધારો થઈ રહ્યો છે. હાલમાં ડેમમાં 8 લાખ 55 હજાર ક્યુસેક પાણીની આવક થઈ છે. પાણીની આવક થતા ડેમના 23 દરવાજા ખોલવામાં આવ્યા છે.
નર્મદા ડેમમાંથી 8 લાખ 11 હજાર ક્યુસેક પાણી છોડવામાં આવી રહ્યુ છે. હાલ ડેમમાં 5484.87 MCM લાઈવ સ્ટોરેજ પાણીનો જથ્થો નોંધાયો છે. ડેમમાં પાણીની આવક થતા તંત્ર એલર્ટ થયુ છે. તંત્રએ સાવચેતીના ભાગરૂપે કેવડિયા પાસેના ગોરા બ્રિજ 7 દિવસ સુધી બંધ રાખ્યો છે. આ સાથે જ નદીકાંઠાના 175 ગામોને એલર્ટ પણ કરવામાં આવ્યા છે. તમામ ગામોમાં TDO અને સરપંચને સ્ટેન્ડ બાય રહેવાના આદેશ અપાયા છે.
છોટા ઉદેપુરમાં જળબંબાકાર
છોટાઉદેપુરમાં ધોધમાર વરસાદ પડ્યો છે. 2 કલાકમાં 4 ઇંચ જેટલો વરસાદ પડ્યો જેના કારણે નીચાણવાળા વિસ્તારમાં પાણી ભરાઇ ગયા છે. સેવાસદન રોડ, શાસ્ત્રી બાગ વિસ્તાર અને મંગળ બજારના રહેણાક વિસ્તારમાં પાણી ભરાઇ ગયા છે. જેના કારણે લોકોને મુશ્કેલી પડી રહી છે.