સુરતમાં વધતી જતી ગુનાખોરીને લઈને સુરત પોલીસ હવે એક્શન મોડમાં આવી છે. સુરત પોલીસે અલગ અલગ વિસ્તારમાં સ્પેશિયલ ડ્રાઇવ કરીને ઘાતક હથિયારો કબજે કર્યા છે.
સુરતમાંથી મળી આવ્યા ઘાતક હથિયાર
તલવાર, છરા, ચપ્પુ જેવા ઘાતક હથિયાર મળી આવ્યા
તમામ વિરુદ્ધ કલમ 135 હેઠળ કરવામાં આવી કાર્યવાહી
સુરત શહેરમાં દિવસેને દિવસે ક્રાઇમમાં વધારો થઇ રહ્યો છે. અસામાજિક તત્વો બેફામ બની રહ્યા છે. ઠેરઠેર હપ્તા વસૂલી, દાદાગીરી, લૂંટફાટ, સ્નેચિંગ, ચોરી, હત્યા, વ્યાજખોરી અને દુષ્કર્મ જેવી ઘટનાઓ બનતી નજરે પડે છે. શહેરીજનો પણ આવા તત્વોથી પરેશાન થઇ ચૂક્યા છે. લુખ્ખા તત્વો કાયદાનો ભંગ કરીને ખુલ્લેઆમ ફરી રહ્યા છે. ગુનાહિત ઇતિહાસ વાળા શખ્સો ફરીથી એજ રવાડે ચડીને નવા ગુનાઓ કરે છે. થોડા દિવસો પહેલા જ ગ્રીષ્મા વેકરિયાની હત્યાના ઘેરા પ્રત્યાઘાત રાજ્યમાં પડ્યા છે. જ્યારબાદ સુરત પોલીસની ઉંઘ ઉડી હોય તેવુ લાગી રહ્યું છે. તાબડતોબ કાયદો વ્યવસ્થાનું સમારકામ કરવા લાગી ગયા છે.
સુરતમાં પોલીસને સ્પેશિયલ ડ્રાઇવ દરમિયાન ઘાતક હથિયાર મળી આવ્યા છે. પોલીસે લીંબાયત, પાંડેસરા, ઉધના, ડિંડોલીમાં કોમ્બિંગ કર્યુ હતું. રેમ્બો છરા, ગુપ્તી, તલવાર, છરા, ચપ્પુ જેવા ઘાતક હથિયાર 402 લોકો પાસેથી કબ્જે કરવામાં આવ્યા છે. તમામ વિરુદ્ધ કલમ 135 હેઠળ કાર્યવાહી કરવામાં આવી છે. અલગ-અલગ વિસ્તારમાંથી હથિયાર મળી આવ્યા છે, ત્યારે હજુ પણ આ પ્રકારની કાર્યવાહી યથાવત્ રાખવામાં આવી છે.
ઉલ્લેખનીય છે કે અગાઉ સુરત પોલીસે શાળા-કોલેજો બહાર બેસવા પર પ્રતિબંધ ફરમાવી દીધો છે. રોમિયો ગિરી કરતા લોકો સામે કાર્યવાહી શરૂ કરાઈ છે. તેમજ શહેરમાં ચાલતા કપલ બોક્સ પણ બંધ કરવામાં આવ્યા છે.