મહેન્દ્ર સિંહ ધોની કેપ્ટન તરીકે ખૂબ લોકપ્રિય રહ્યા છે, માત્ર ચાહકો જ નહીં ટીમના ખેલાડીઓ પણ એમએસ ધોનીથી ખૂબ પ્રભાવિત રહેતા હતા. ટીમ ઇન્ડિયાના પૂર્વ ખેલાડી ગૌતમ ગંભીરે પણ મહેન્દ્ર સિંહ ધોની સાથેના દિવસો યાદ કરતા જણાવ્યું છે જ્યારે તે અને ધોનીએ ફર્શ પર સુઈ જવું પડ્યું હતું.
રૂમ ખૂબ નાનો હતો તેથી જમીન પર સુઈ જવું પડતું : ગંભીર
અમે ધોનીના લાંબા વાળ વિશે વાત કરતા : ગૌતમ ગંભીર
જ્યારે કોઈ વ્યક્તિ સાથે રૂમ શેર કરો તો તેના વિશે ઘણું જાણવા મળે છે : ગંભીર
એમ એસ ધોનીના વ્યક્તિત્વનાં કારણે જ તેમને કેપ્ટન કૂલ તરીકે ઓળખવામાં આવે છે. એમ એસ ધોની લાંબા સમય સુધી ભારતની ક્રિકેટ ટીમનાં સુકાની રહ્યા અને આ દરમિયાન તેમની સાથે બનેલા સંબંધોને આજે પણ ટીમનાં વર્તમાન અને પૂર્વ ખેલાડીઓ યાદ કરે છે. ગૌતમ ગંભીર એવા ખેલાડી છે જે કરિયરની શરૂઆતમાં એમ એસ ધોની સાથે રૂમ શેર કરતા હતા. એક ચેટ શોમાં ગંભીરે પોતાના અનુભવ શેર કર્યા છે.
ગૌતમ ગંભીરે કહ્યું કે અમે એક સિરીઝમાં એક મહિનાથી વધારે રૂમ પાર્ટનર રહ્યા અને અમે તેમના વાળ વિશે વાતો કરતા કારણ કે એમએસનાં વાળ તે સમયે ખૂબ લાંબા હતા. અમે વાતો કરતા કે તે વાળની કઈ રીતે સરસંભાળ રાખ છે. ગૌતમે કહ્યું કે મને યાદ છે કે એક વાર અમને ખૂબ નાનો રૂમ મળ્યો તો અમે ફર્શ પર જ સૂઈ ગયા. અમે તે વાત પર ચર્ચા કરતા કે કઈ રીતે રૂમને મોટો કરી શકાય. અમે બેડને રૂમથી બહાર કરી દીધો પછી ફર્શ પર જ ગાદલું પાથરીને સૂયા. ખરેખર તે ક્ષણ ખૂબ મજેદાર હતા.
ગંભીરે કહ્યું કે જ્યારે તમે કોઈ વ્યક્તિ સાથે રૂમ શેર કરો છો ત્યારે તે વ્યક્તિ વિશે ઘણું બધું જાણવા મળે છે. તેમણે કહ્યું કે અમે બંને યુવાન હતા અને એમએસ ધોનીએ તાજેતરમાં આંતરરાષ્ટ્રિય ક્રિકેટ રમવાની શરૂઆત કરી હતી. અમે ભારતની ટીમ તરફથી કેન્યા ને ઝિમ્બાબ્વેના પ્રવાસ પર સાથે ગયા હતા અને ઘણો બધો સમય સાથે પસાર કર્યો. જ્યારે તમે કોઈ વ્યક્તિ સાથે દોઢ મહિનો પસાર કરો તો તે વ્યક્તિ વિશે ઘણું બધું જાણવા મળે છે.