વર્લ્ડ કપના 36મા મુકાબલામાં આજે લીડ્સમાં પાકિસ્તાન અને અફઘાનિસ્તાન ટીમ આમને-સામને હતી. પાકિસ્તાન માટે આ જંગ કરો યા મરો સમાન હતો જેમાં તે ખરું ઉતરતા અફઘાનિસ્તાને 3 વિકેટે હાર આપી હતી. આ જીત સાથે પાકિસ્તાન હજુ પણ વર્લ્ડ કપમાં જીવિત છે અને સેમી ફાઈનલ તરફ જવાનો પોતાનો રસ્તો મજબૂત કર્યો છે.
આજે અફઘાનિસ્તાને ટૉસ જીતીને પ્રથમ બેટિંગનો નિર્ણય કર્યો હતો અને પાકિસ્તાનને 228 રનનો ટાર્ગેટ આપ્યો હતો. જેની સામે પાકિસ્તાને 49.4 ઓવરમાં 7 વિકેટે 230 રન બનાવીને શાનદાર જીત મેળવી હતી. પાકિસ્તાન તરફથી સૌથી વધુ રન સાતમા ક્રમે આવેલા ઈમાદ વસિમે (49) ફટકાર્યા હતાં અને પાકિસ્તાનની હારની બાજી જીતમાં બદલી નાંખી હતી. જ્યારે બીજા ક્રમે સૌથી વધુ રન બાબર આઝમે (45) કર્યા હતાં. બાબર આઝમ અને ઈમામ ઉલ હકની જોડીએ પાકિસ્તાનની પ્રથમ વિકેટ જ પડ્યાં બાદ ઇનિંગને સંભાળી હતી.
અફઘાનિસ્તાન તરફથી મુજીબ અને નાબીએ 2-2 વિકેટો ઝડપી હતી જ્યારે રાશિદ ખાને 1 વિકેટ લીધી હતી. અફઘાનિસ્તાન તરફથી બોલરોનું પ્રદર્શન સારું રહ્યું હતું અને પાકિસ્તાનને 228 રનના લક્ષ્યને પાર કરવામાં સંઘર્ષની પરિસ્થિતિ પેદા કરી દીધી હતી.
અફઘાનિસ્તાને પ્રથમ બેટિંગ કરીને પાકિસ્તાનને 228 રનનો લક્ષ્યાંક આપ્યો હતો. અફઘાનિસ્તાન તફથી સૌથી વધુ રન અનુક્રમે અસઘર અફઘાન (42), નઝીબુલ્લા ઝદરાન (42), રાહમત શાહ (35) અને ઈકરામ અલી ખીલ (24) કર્યા હતા.
જ્યારે પાકિસ્તાન તરફથી બોલરોમાં શાહિન અફ્રિદીએ તરખાટ મચાવીને 4 વિકેટો ખેરવી હતી. જ્યારે ઈમાદ વસીમ અને વહાબ રિયાઝે 2-2 વિકેટો ઝડપી હતી તો શાદાબ ખાને 1 વિકેટ ખેરવી હતી.
પાકિસ્તાનનું સેમીમાં પ્રવેશ માટેનું સમીકરણ
આ જીત સાથે હવે પાકિસ્તાન પોઈન્ટ ટેબલમાં 9 પોઈન્ટ્સ સાથે ચોથા ક્રમે પહોંચી ગયું છે. એટલે હવે પાકિસ્તાન પાસે સેમી ફાઈનલમાં પ્રવેશની તક વધી ગઈ છે. હવે પાકિસ્તાનની આગામી મૅચ 5 જુલાઈએ બાંગ્લાદેશ સામે છે ત્યારે જો પાકિસ્તાન જીતી જાય છે તો 11 પોઈન્ટ્સ સાથે ચોથા ક્રમે રહેશે.
આવામાં હાલ પાંચમા ક્રમે ઈંગ્લેન્ડ છે અને જો ઈંગ્લેન્ડની મેચ 30 જૂને ભારત સામે છે અને જો ત્યારે ઈંગ્લેન્ડ હારી જાય છે પાકિસ્તાન ચોક્કસપણે સેમી ફાઈનલમાં એન્ટ્રી મેળવી લેશે. એટલે જો ઈંગ્લેન્ડની બાકી રહેલી 2 મેચોમાંથી એક પણ હારી જાય તો પાકિસ્તાન માટે સેમીમાં એન્ટ્રીની તક વધુ મજબૂત બની જશે.
બીજી બાજુ દાવેદાર ગણાતી બાંગ્લાદેશ 7 પોઈન્ટ્સ સાથે છઠ્ઠા ક્રમે છે. જો આગામી બંને મેચો બાંગ્લાદેશ જીતે તો પાકિસ્તાનના બદલે બાંગ્લાદેશ સેમી ફાઈનલમાં એન્ટ્રી મેળવશે. ઉલ્લેખનીય છે કે બાંગ્લાદેશની એક મેચ જુલાઈ 2ના રોજ ભારત સામે પણ છે.
એક પછી એક જીત જોતાં પાકિસ્તાન 1992નો ઈતિહાસ ફરી દોહરાવે તેવી શક્યતા ચોક્કસપણે દેખાઈ રહી છે.