ઓફિસમાં 12 કલાક કામ કરવાનું રહેશે સાથે 5 કલાકે બ્રેક આપવો કંપની માટે જરૂરી રહેશે પણ અઠવાડિયાં ત્રણ દિવસ રહેશે રજા
ઓક્ટોબરમાં બદલાઈ શકે છે ઓફિસમાં કામ કરવાનો નિયમ
ઓફિસ કામકાજના નિયમમાં થશે ધરમૂળથી ફેરફાર
જો વધારાનું કામ કરાવવામાં આવશે તો 30 મિનિટનો ઓવરટાઈમ ગણવામાં આવશે
મોદી સરકાર 1 ઓક્ટોબરથી લેબર કોડના નવા નિયમો લાગુ કરવા જઇ રહી છે. જો દેશમાં ઓક્ટોબરમાં આ લેબર કોડના નિયમો લાગુ કરવામાં આવશે તો તમારા ઓફિસના કામ કરવાના સમયમાં મોટો બદલાવ થઈ શકે છે. તમારો કામ કરવાનો સમય વધી શકે છે. પણ સાથે કોઈપણ કંપનીએ 5 કલાકથી વધુ કર્મચારી પાસે કામ કરાવી શકશે નહીં. તેમણે કર્મચારીને બ્રેક આપવો ફરજિયાત રહેશે.
5 કલાકે આપવો પડશે 1/2 કલાકનો બ્રેક
લેબર કોડના નિયમ લાગુ પાડવાની સાથે જ કોઈપણ કંપની કર્મચારીઓ પાસે 5 કલાકથી વધુ કામ કરાવી શકશે નહીં, તેમણે રિસેસ આપવી જરૂરી રહેશે, કર્મચારીઓને 5 કલાકે અડધો કલાકનો બ્રેક આપવાનો રહેશે આમ 12 કલાકની શિફ્ટમાં કર્મચારીને 5-5 કલાકે 2 બ્રેક મળશે. અને કુલ 1 કલાકનો સમય તેને રિસેસ માટે મળશે.
ઓવર ટાઈમના નિયમમાં પણ થશે ફેરફાર
ઓએસચ કોડના ડ્રાફ્ટના નિયમો પ્રમાણે 15 થી 30 મિનિટની વચ્ચે જો વધારાનું કામ કરાવવામાં આવશે તો 30 મિનિટનો ઓવરટાઈમ ગણવામાં આવશે. હાલના નિયમ પ્રમાણે 30 મિનિટ સુધીનો કામકાજનો વધારાનો સમય, ઓવર ટાઈમ ગણવામાં આવતો નથી.
વધી શકે છે કામકાજનો સમય
અત્યારે મોટાભાગની ઓફિસોમાં 8 કે 9 કલાકની શિફ્ટ પ્રમાણે કામ કરવામાં આવે છે. નવા લેબર કોડમાં કામનો સમય વધારી 12 કલાક કરવાનો નિયમ છે. આથી અઠવાડિયામાં 48 કલાક કામ કરવાનું રહેશે. જો કોઈ વ્યક્તિ રોજ 8 કલાક કામ કરે છે તો તેને 1 દિવસની રજા, જો કોઈ વ્યક્તિ રોજ 9 કલાક કામ કરે છે તો અઠવાડિયામાં 2 દિવસની રજા, અને જો કોઈ 12 કલાક કામ કરે છે તો અઠવાડિયામાં 3 દિવસની રજા મળશે. જો કે મજૂર યુનિયનો 12 કલાકની નૌકરી કરવાનો વિરોધ કરી રહ્યા છે.
1 ઓક્ટોબરથી લાગુ થઈ શકે છે આ નિયમો
સરકાર નવા લેબર કોડને 1 એપ્રિલથી લાગુ કરવાનું મન બનાવી રહી હતી. પણ ઘણા રાજ્યો આ માટે તૈયાર ન હોવાથી તેમજ કંપનીઓની HR Policy બદલવામાં વધારાના દીધેલાં સમયને કારણે તેને પહેલા ટાળી દેવામાં આવ્યું હતું. લેબર મિનિસ્ટ્રીના જણાવ્યા અનુસાર લેબર કોડના નિયમોને 1 જુલાઇથી સૂચિત કરવાનો પ્લાન હતો પણ રાજ્યોએ આ નિયમ લાગુ કરવા માટે વધારાનો સમય માંગ્યો હોવાથી તેને 1 ઓક્ટોબર સુધી ટાળી દેવામાં આવ્યો છે.
સપ્ટેમ્બર 2020માં જ પાસ થયો છે ખરડો
સંસદમાં ઓગસ્ટ 2019માં જ ત્રણ લેબર કોડ- ઔધોગિક સંબંધો, કામની સલામતી, કામ કરવાની સ્થિતિ તેમજ સામાજિક સુરક્ષાથી જોડાયેલા નિયમોમાં બદલાવ કર્યો હતો. આ નિયમો સપ્ટેમ્બર 2020 સંસદમાં પાસ થયા છે. ત્યારે આવનાર સમયમાં ઓફિસમાં 4 દિવસ 12 કલાક કામ અને પછીના 3 દિવસ રજા રહે તો નવાઈ નહીં