વડોદરા / પાણીના ટેન્કરે એક્ટિવાને મારી ટક્કર, માતા-બાળકનું મોત

સંતરામપુર તાલુકાના મોટી સરથાણ ગામના પંચાલ ફ‌િળયામાં રહેતા સતીશ ચુનિલાલ દરજી (ઉં.વ.૩૦)નાં પત્ની નિમિષા અને એક વર્ષનો પુત્ર શૌર્ય વડોદરા નજીક સમલાયા ખાતે રહેતાં માસીના ઘરે આવ્યાં હતાં. આજે સવારે વડોદરામાં ખરીદી કરવા આવવા માટે નિમિષા તેના પુત્ર શૌર્ય સાથે એક્ટિવા લઇને નીકળી હતી.

તે સવારના આશરે ૧૦.૩૦ વાગ્યાના અરસામાં સમયલાયાથી વડોદરા આવી રહી હતી ત્યારે અટલાદરા નજીક રેલવે ફાટક પાસે પાણીનું ટેન્કર તીવ્ર ગ‌િતથી ધસી આવ્યું હતું અને એક્ટિવાને ટક્કર મારી હતી. ટેન્કરની ટક્કરથી નિમિષા અને શૌર્ય ઊછળી પડ્યાં હતાં અને ટેન્કર તે બન્ને પર ફરી વળ્યું હતું.

આ ઘટના એટલી ભયંકર હતી કે એક વર્ષના ફૂલ જેવા કોમળ શૌર્યના શરીરના તો ફુરચેફુરચા ઊડી ગયા હતા, જ્યારે નિમિષાના માથા પર ટેન્કરનું વ્હિલ ફરી વળ્યું હોવાથી બન્નેનાં ઘટનાસ્થળે જ મોત થયાં હતાં. અકસ્માત બાદ લોકોએ એમ્બ્યુલન્સ બોલાવી હતી.

પરંતુ ઘટનાના બે કલાક પછી એમ્બ્યુલન્સ આવી હતી અને મૃતદેહ લઇ જવાની ના પાડીને એમ્બ્યુલન્સ જતી રહી હતી. આથી લોકોનો ગુસ્સો ભડ્ક્યો  હતો અને રોડ બ્લોક કરી દીધો હતો. વડોદરા જેવા શહેરમાં મૃતદેહ લઇ જવા માટે કોઇ સગવડ નહીં હોવાથી આખરે એક ટેમ્પામાં નાખીને લઇ જવાયા હતા.