જામનગરના હાથણી વિસ્તારના રહીશોએ મહાનગરપાલિકા કચેરીમાં રાસડા રમીને પ્રાથમિક સુવિધાની માંગ સાથે વિરોધ વ્યક્ત કર્યો હતો.
જામનગરના હાથણી વિસ્તારમાં પ્રાથમિક સુવિધાનો અભાવ
પીવાનું પાણી, સ્ટ્રીટ લાઈટ, CC રોડની સુવિધા નહીં
મહાપાલિકાના બિલ્ડિંગમાં રાસ રમીને કર્યો વિરોધ
ચોપડે વિકાસની હરણફાળ ભરતા જામનગરના આજે પણ અનેક વિસ્તારો પ્રાથમિક સુવિધાઓ ઝંખી રહ્યા છે. વિસ્તારવાસીઓ દ્વારા છાશવારે કરાતી રજૂઆતએ અસુવિધાની ચાડી ખાઈ રહી છે. છતાં પણ પદાધિકારીઓ, અધિકારીઓ રજૂઆતને ન ગણકારતા હોવાની પણ રાવ ઉઠી છે. ટેક્સ ઉઘરાવવામાં આંધળી દોટ મુકતું તંત્ર સુવિધા આપવામાં વામળુ સાબિત થતા લોકોમાં રોષ જોવા મળી રહ્યો છે. તેવામાં જામનગર શહેરના વોર્ડ નં 4માં આવેલ હાથણી વિસ્તારમાં પ્રાથમિક સુવિધાની માંગ સાથે વિસ્તારવાસીઓ ધરણા કર્યા હતા. સ્થાનિક લોકોએ મહાપાલિકાના બિલ્ડિંગમાં રાસડા રમીને આક્રોશ ઠાલવ્યો હતો.
પાણી આપો, અમને પાણી આપો...: જામનગરમાં ગરબા ગાઈને મહિલાઓનો અનોખો વિરોધ
— VTV Gujarati News and Beyond (@VtvGujarati) June 29, 2022
મહાપાલિકા ઓફિસ પાસે સ્થાનિકોનો વિરોધ
જામનગર શહેરના વોર્ડ નં 4માં આવેલ હાથણી વિસ્તારમાં છેલ્લા ઘણા સમયથી પ્રાથમિક સુવિધાઓથી વંચિત છે. જેને લઇને સ્થાનિકો અને વોર્ડ નંબર 4 ના કોંગી કોર્પોરેટર રચના નંદાણીયા અને વોર્ડ નં.12 ના કોર્પોરેટર જેનબ ખફીએ તંત્રની આંખ ઊઘાડવા મહાનગરપાલિકાના બિલ્ડિંગમાં રાસ રમી અનોખો વિરોધ પ્રદર્શિત કર્યો હતો. હાથણી વિસ્તારમાં પીવાનું પાણી, સ્ટ્રીટ લાઈટ, સી સી રોડ સહિતની પ્રાથમિક સુવિધાઓનો વર્ષોથી અભાવ જોવા મળી રહ્યો છે આથી લોકોએ આક્રોશભેર રજૂઆત કરી હતી. વધુમાં 'સુવિધા અપો'ની માંગ સાથે તંત્ર વિરુદ્ધ સૂત્રોચાર પણ કર્યા હતા.
પૂલ બનાવવાની પણ કરાઇ રજૂઆત
રોડ-રસ્તા સહિતની પ્રાથમિક સુવિધાના અભાવની સાથે સાથે ચોમાસા દરમિયાન હાથણી વિસ્તારમાં પાણી ભરાવાની સમસ્યા માથું ઉચકે છે. જેને લઇને આ વિસ્તાર સંપર્ક વિહોણો થઈ જતો હોવાથી અહી પૂલ બનાવી આપવા પણ રજૂઆત કરવામાં આવી છે. તંત્ર લોકોની પરેશાની પારખી આ દિશામાં સત્વરે કાર્યવાહી હાથ ધરે તેવી અંતમાં રજૂઆત કરવામાં આવી હતી.