ચોમાસું / ઉપરવાસમાં વરસાદને પગલે ઉત્તર ગુજરાતની જીવાદોરી સમાન ધરોઈ ડેમની જળસપાટીમાં વધારો

માત્ર 37 દિવસમાં 11 હજાર 265 MCFT પાણી

6 સપ્ટેમ્બર સુધીમાં એટલે કે માત્ર 37 દિવસમાં 11 હજાર 265 MCFT નવું પાણી ઉમેરાતાં 27.74 ફૂટ સપાટી વધી છે. અત્યારે ડેમમાં 610 ફૂટે 15 હજાર 32 MCFT પાણીનો સંગ્રહ થયો છે. દોઢ વર્ષ બાદ ડેમમાં 58.34% પાણીનો જથ્થો સંગ્રહ થયો છે.

 20 સપ્ટેમ્બર સુધી ચાલુ રહેશે પાણીની આવક

સરળ ભાષામાં સમજીએ તો ડેમમાં અત્યારે મહેસાણા, પાટણ અને બનાસકાંઠા જિલ્લાની 14 લાખ પ્રજાને લગભગ બે વર્ષ સુધી પીવાનું પાણી આપી શકાય એટલું પાણી છે. ડેમમાં હજુ 14 હજાર 211 ક્યુસેક પાણીની આવક થઇ રહી છે, નિષ્ણાંતોના મત્તે ધરોઇ ડેમના ઉપરવાસમાં હજુ સારા વરસાદની શક્યતા છે, જે જોતાં આગામી 20 સપ્ટેમ્બર સુધી ડેમમાં 7થી 10 ટકા જેટલી પાણીની આવક થઇ શકે છે.

સીપુ અને દાંતીવાડા ડેમમાં પાણીની આવકમાં વધારો

નોંધનીય છે કે, ગુજરાતના પડોશી રાજ્ય રાજસ્થાનના ઉપરવાસમાં વરસાદ પડવાથી બનાસકાંઠાના સીપુ અને દાંતીવાડા ડેમમાં પાણીની આવકમાં સારો એવો વધારો નોંધાયો છે. સીપુ ડેમમાં 8.17 અબજ લિટર પાણીની આવક થતાં હાલ સપાટી 580 ફૂટ નોંધાઇ છે. જ્યારે દાંતીવાડા ડેમમાં 1.76 અબજ લિટર પાણીની આવક થતાં સપાટી 546.30 ફૂટ નોંધાયેલ છે. 

સીપુ નદીમાં 20,000 હજાર તેમજ દાંતીવાડા ડેમમાં 3618 ક્યુસેક પાણીની આવક સીઝનમાં પ્રથમ વાર નોંધાવા પામી હતી. ચાલુ વર્ષે ગરમીના સમયગાળામાં સીપુ અને દાંતીવાડા ડેમની સપાટીમાં ચિંતાજનક રીતે ઘટાડો નોંધાવા પામ્યો હતો. જો કે, રાજસ્થાનમાં વરસાદ થતાં સીપુ અને દાંતીવાડા ડેમમાં પાણીની આવક વધી છે.