સૌરાષ્ટ્રમાં મેઘ મહેરથી ડેમોમાં નવા નીરની આવક શરૂ થઈ છે. ઉપરવાસમાં વરસાદને કારણે સૌરાષ્ટ્રના અનેક ડેમોમાં નવા નીરની આવક શરૂ થઈ છે. જેને લઇને ખેડૂતોમાં ખુશીની લાગણી પ્રસરી છે.
જુદા જુદા ડેમોની વાત કરવામાં આવે તો ભાદર ડેમની સપાટીમાં અડધા ફૂટનો વધારો થયો છે. તો આજી-2 ડેમની સપાટીમાં એક ફૂટ જેટલો વધારો થયો છે. જ્યારે ન્યારી ડેમની સપાટીમાં દોઢ ફૂટનો વધારો થયો છે.
તો મોરબીના વાડીસંગ ડેમમાં અઢી ફૂટ પાણીની આવક થઈ છે. આ ઉપરાંત દેવભૂમિ દ્વારકાના ભોગાવો-2 ડેમમાં 0.50 ફૂટ અને સબુરીમાં 13.12 ફુટ પાણીની આવક થઈ છે. ડેમમાં નવા નીરની આવક થતા ખેતીમાં ફાયદો થવાની આશા સેવાઈ રહી છે. જેને લઈને ધરતીપુત્રોમાં ખૂશીની લહેર છવાયેલી છે.
મહત્વનું છે કે, સૌરાષ્ટ્રમાં પણ ધીમે ધીમે ચોમાસું જામતું જઈ રહ્યું છે. ત્યારે રાજકોટ જિલ્લામાં છેલ્લા 24 કલાકમાં અનરાધાર વરસાદ વરસ્યો હતો. રાજ્યમાં છેલ્લા 24 કલાકમાં 70 તાલુકાઓમાં વરસાદ વરસ્યો છે. સૌથી વધુ ગોંડલ તાલુકામાં 5.5 ઈંચ વરસાદ વરસ્યો હતો. તો ધોરાજીમાં 4 ઈંચ, લોધિકામાં સાડા ત્રણ ઈંચ, ઉપલેટામાં 3 ઈંચ, કોટડામાં બે ઈંચ વરસાદ વરસ્યો, તો પડધરી, રાજકોટ તાલુકામાં અને જામ કંડોરણામાં પોણા બે ઈંચ વરસાદ વરસ્યો છે. તો બીજી તરફ વિંછીયા અને જસદણમાં દોઢ ઈંચ જ્યારે જેતપુરમાં એક ઈંચ વરસાદ વરસ્યો છે. જેના કારણે ખેડૂતોમાં ખુશીનો માહોલ છવાઈ ગયો છે.
જાંબુઘોડા અને અમરેલીમાં અનરાધાર
જાંબુઘોડા અને અમરેલીમાં 3-3 ઈંચ વરસાદ વરસ્યો હતો. વરસાદ આવતા અનેક વિસ્તારોમાં પાણી ભરાવવાની પણ ઘટનાઓ સામે આવી છે. છેલ્લા 24 કલાકમાં અમરેલીમાં 3 ઈંચ, ઉનામાં અઢી ઈંચ, પાલીતાણામાં અઢી ઈંચ, સાવરકુંડલામાં સવા બે ઈંચ, વઘઈમાં પોણા બે ઈંચ, વિસાવદરમાં પોણા બે ઈંચ, ધાનપુરમાં પોણા બે ઈંચ, ઉમરપાડામાં દોઢ ઈંચ, ડભોઈમાં સવા ઈંચ વરસ્યો હતો.