બોરમાંથી આવે છે ખારુ પાણી, દાહોદના મોટી સારસીના ગ્રામજનો ઈચ્છે છે ઘરઆંગણે પીવાનું પાણી સારું આવે
પીવાના પાણીની પારાયણ
એક ટીપાં માટે તરસતા ગ્રામજનો
ખાબોચિયામાંથી પાણી ભરવા મજબૂર
હાથમાં બેડુ.. અને મોઢા પર કપડુ બાંધીને જતી આ મહિલાઓ મજબૂર છે.. મજબૂર છે પરિવારના સભ્યોની તરસ છીપાવવા માટે.. શહેરીજનોને ભલે હર ઘર નળમાં પીવાનું પાણી મળી રહ્યું હોય પણ રાજ્યના અનેક ગામડાઓ એવા છે જ્યાં લોકો એક બુંદ પાણી માટે વલખાં મારી રહ્યા છે. દાહોદ તાલુકાના મોટી સારસી ગામના આ દ્રશ્યો છે. ધમધોખતો તાપ છે તેવામાં કેટલીક મહિલાઓ પીવાનું પાણી ભરવા માટે એકઠી થઈ છે.
દાહોદના મોટી સારસીમાં પાણીની અછત
કોતરમાંથી પાણી ઝરી રહ્યું છે. અને ખાબોચિયું ભરાઈ રહ્યું છે. આ મહિલાઓ વાસણની મદદથી ખાબોચિયામાંથી પાણી ઉલેચીને ભરી રહી છે.. ફિલ્ટર પાણી પીતા શહેરીજનોએ કલ્પના પણ નહીં કરી હોય તેવી સ્થિતિમાં ભરાયેલા આ ખાબોચિયામાંથી મહિલાઓ પીવા માટે પાણી ગાળીને ભરી રહી છે. આ દ્રશ્ય પરથી જ કહી શકાય છે કે દાહોદની મોટી સારસી ગામમાં પીવાના પાણીની મુશ્કેલી કેટલી હદે હશે.
2 કિમી ચાલ્યા બાદ છીપાય છે તરસ
મોટી સારસી ગામની મહિલાઓને તરસ છીપાવવા માટે 2 કિલોમીટર સુધી પગપાળા ચાલવું પડે છે. મહિલાઓના મતે સરપંચ દ્વારા 3 ઘર વચ્ચે એક બોરની વ્યવસ્થા તો કરી આપવામાં આવી છે. પણ બોરનું પાણી ખારું અને ક્ષારયુક્ત આવતું હોવાથી પીવા માટે એ પાણીનો ઉપયોગ નથી કરી શકાતો. એટલું જ નહીં જમવાનું બનાવવામાં પણ ખારું પાણી ઉપયોગમાં નથી લઈ શકાતું. જેથી શુદ્ધ પાણીની શોધમાં મહિલાઓ 2 કિમી પગપાળા ચાલીને નાની કોતરમાં ખાબોચિયામાંથી પાણી ઉલેચીને ભરી જાય છે.
ગ્રામજનોની માગ તંત્ર ક્યારે સાંભળશે?
મહિલાઓ જ નહીં પણ આસપાસના કેટલાક ગામના પુરુષો પણ અહીં આવે છે અને પીવાના પાણી માટે કેન ભરી જાય છે.. એટલે કે આસપાસના અનેક ગામડાઓમાં પીવાના પાણીની મુશ્કેલી છે.. જોકે આ એક કુદરતી ઝરણું છે અને આ ઝરણાથી લોકો તરસ છીપાવે છે. મહિલાઓ 45 ડિગ્રી તાપમાનમાં પણ 2 કિલોમીટર સુધી ચાલીને પીવાનું પાણી ભરવા જાયછે. ત્યારે મહિલાઓની માગ છે કે તંત્ર દ્વારા તેમના ઘર આંગણે શુદ્ધ અને પીવા લાયક પાણી મળે તો તેમની પાણીની સમસ્યાનો અંત આવી શકે છે. જોકે તંત્ર હવે આ મહિલાઓની મુશ્કેલીને કયારે સમજે છે તે જોવું રહ્યું.