ગુજરાતનાં આ વિસ્તારમાં પાણીની એટલી તંગી કે ઢોરનું પાણી પીવા માટે લેવું પડે છે

ઉનાળાની શરૂ થતાં જ રાજ્યના અનેક વિસ્તારોમાં પાણીનો પોકાર ઉઠવા લાગ્યો છે. અમરેલી જિલ્લામાં આમ પણ સામાન્ય દિવસોમાં પાણીની તંગી જોવા મળે છે તેમાં હવે  ઉનાળાની શરૂઆત થતાં જ પાણીની સમસ્યાએ ગંભીર સ્વરૂપ ધારણ કર્યું છે. અમરેલી જિલ્લાનાં અનેક ગામડાઓમાં લોકોને પીવાનાં પાણી માટે ખાનગી ટેન્કરોનો સહારો લેવો પડી રહ્યો છે વાત એટલી વણસી છે કે કેટલાક ગામોમાં ઢોર માટે બનાવેલા અવેડામાંથી લોકોને પીવા માટે પાણી લેવું પડી રહ્યું છે.

આ છે અમરેલી જિલ્લાનાં સાવરકુંડલા તાલુકાનું મેરિયાણા ગામ. હજુ તો ઉનાળાનું ધીમા પગલે આગમન થઈ રહ્યું છે ત્યાં જ આ ગામનાં લોકોને પાણી માટે હાલાંકી શરૂ થઈ ગઈ છે. આ ગામનો આ અવેડો અને ધીમીધારે આવતું આ પાણી જ હવે માત્ર આખા ગામ માટે પાણીનો સોર્સ બચ્યો છે. જો કે આ પાણી પણ કેટલા દિવસ સાથ આપશે તે કહેવું મુશ્કેલ છે.



અમરેલી સૌરાષ્ટ્રનો હિસ્સો છે અહીં મૂંગા પ્રાણીઓ માટે દાન પુણ્યનો અનેરો મહિમા છે પરંતુ વિધિની વક્રતા જુઓ કે કુદરતની કસોટી કહો આજે ગામનાં આ માયાળુ લોકોને પ્રાણીઓ માટે બનાવેલા અવેડામાંથી જ પાણી ભરવું પડે છે. અહીંથી પાણી ભરતાં તેમનો જીવ તો ઘણો કચવાય છે તેમને લાગે છે કે તેઓ મૂંગા પ્રાણીઓનાં હિસ્સાનાં જળમાંથી ભાગ પડાવી રહ્યા છે પરંતુ તેઓ લાચાર છે.

ગામમાં આ સિવાય પીવાનાં પાણી માટે કોઈ બીજો સોર્સ નથી. એટલે જ તો માલઢોર પણ અહીં જ પાણી પીવે છે અને ગ્રામજનો પણ અહીંથી જ પાણીં ભરવા લાચાર છે. તંત્રની બલિહારી જુઓ તેણે કુવો તો મંજૂર કર્યો છે પરંતુ તે પ્રમાણે રકમની ફાળવણી કરી નથી.



બીજો એક ડાર છે ત્યાં મોટર મુકવામાં આવે તો ત્યાંથી પણ થોડું પાણી મળી શકે પરંતુ તેની પણ તંત્ર દ્વારા મંજૂરી મળતી નથી. સરપંચ દ્વારા, તાલુકા પંચાયત, જિલ્લા પંચાયત, ધારાસભ્ય , સંસદસભ્ય દરેકને રજૂઆત કરવામાં આવી છે. પરંતુ બધાં અત્યારે ચૂંટણીમાં વ્યસ્ત છે કોઈને ગામનાં લોકોની હાલાકી હલ કરવા માટે સમય નથી.

અમરેલીનાં સાવરકુંડલા તાલુકાનાં મેરીયાણા ગામે છેલ્લાં 20 દિવસથી પીવાનાં પાણી માટે લોકોમાં રઝળપાટ શરૂ થઈ ગયો છે. 1700ની વસ્તી ધરાવતા મેરીયાણા ગામમાં એક માત્ર પીવાના પાણીનો બોર છે જે હાલ ઉનાળાનાં આરંભે જ સૂકાઈ ગયો છે.



નર્મદાનું પાણી એટલું તો અનિયમિત આવે છે કે લોકોને યાદ નથી કે  છેલ્લે કયાં દિવસે આવ્યું હતું. એક તો  નર્મદાનું અનિયમિત આવતું પાણી અને બીજી બાજુ પાઇપ લાઈનની કામગીરી ચાલું હોવાંથી છેલ્લાં 20 દિવસ ઉપરાંતથી પીવાનું પાણી મેરીયાણાનાં ગ્રામજનોને મળ્યું નથી.

જો કે, ગામનાં એક સેવાભાવી યુવક દ્વારા મીની ટ્રેકટર દ્વારા ગામનાં એકાદ વિસ્તારને પાણી પૂરું પાડવાની નિશુલ્ક સેવા કરવામાં આવે છે પરંતુ ગામ મોટું છે. આટલાં પાણીથી તેમનું કામ ચાલે તેમ નથી આથી જ્યારે પાણીનું ટેન્કર ગામમાં આવે ત્યારે પાણી મેળવવા માટે મહિલાઓ વચ્ચે રીતસર પડાપડી થાય છે.



જે ક્યારેક મોટા ઝઘડામાં પણ પરિણમે છે. પક્ષ કોઈ પણ હોય ચૂંટણી ટાઈમે મોટામોટા વચનો આપવામાં બધાં શૂરા છે. પણ ચૂંટાઈ ગયાં બાદ ગામડાની સમસ્યાઓ કે પાણીનાં પ્રશ્નો ઉકેલવામાં નેતાઓ અને તેમનું તંત્ર નપાણિયું સાબિત થાય છે. પરંતુ હાલ લોકસભા ચૂંટણી માથે છે જો કોઈ નેતા હજુ પણ અહીં લોકોનાં પ્રાણપ્રશ્ન જેવી પાણીની સમસ્યા ઉકેલવા આગળ નહીં આવે તો ચૂંટણીમાં તેમને પાણી દેખાડવા આ ગામનાં લોકો તૈયાર જ બેઠાં છે તેની નોંધ લેવી જરૂરી છે.