મંત્રીના મત વિસ્તારમાં પાણી માટેફાંફાં મારી રહ્યા છે લોકો, 2017માં જાહેર થયેલી એસ્ટોલ પાણી યોજના શરૂ કરવા માંગ
ઉનાળો શરૂ થતાં જ પાણીનું સંકટ
ગુજરાતનું 'ચેરાપુંજી' તરસ્યું
જમીનમાં પાણીના તળ ગયા ઉંડા
ગુજરાતનો ચેરાપુંજી ગણાતો કપરાડા તાલુકો પણ ઉનાળાની શરૂઆત થતાં જ તરસી રહ્યો છે.પીવાના પાણી માટે અહીં લોકો રઝળપાટ કરી રહ્યા છે.કપરાડાના એસ્ટોલ ગામમાં 500 કરોડના ખર્ચે એસ્ટોલ યોજના શરૂ કરવામાં આવી હતી. જોકે હજુ સુધી યોજના પૂર્ણ ન થતાં સ્થાનિકો પાણી માટે વલખાં મારી રહ્યાં છે.
કલાકો સુધી લાઈનમાં ઊભા રહો ત્યારે 1 કે 2 બેડા પાણી મળે
ગુજરાતનો ચેરાપુંજી ગણાતો કપરાડા તાલુકો પણ હવે પાણીની પળોજણથી બાકાત નથી રહ્યો. અહીં ચોમાસામાં 125 ઈંચથી વધુ વરસાદ વરસે છે. છતાં ઉનાળો શરૂ થતાંની સાથે જ એક બેડા પાણી માટે લોકોને ફાંફા મારવા પડે છે.જંગલ અને પહાડી વિસ્તારમાં લોકોને પાણી માટે રઝળપાટ કરવાનો વારો આવ્યો છે.કપરાડાના છેવાડે આવેલા એસ્ટોલ ગામના લોકો પાણીની સમસ્યાનો સામનો કરી રહ્યા છે. એક હજારથી વધુ લોકો પીવાના પાણી માટે એક માત્ર હેન્ડપંપ અને કૂવા પર નિર્ભર છે.પાણી માટે મહિલાઓને કલાકો સુધી લાઈનમાં બેસવું પડે છે. ત્યારે એક થી બે બેડા પાણી મળે છે.ગ્રામજનોની માગ છે કે સરકાર તેમની પાણીની સમસ્યા વહેલી તકે દૂર કરે.
2017માં જાહેર થયેલી એસ્ટોલ પાણી યોજના શરૂ કરો
વલસાડના કપરાડામાં રાજ્યના અન્ય વિસ્તારોની સરખામણીમાં સૌથી વધુ વરસાદ પડે છે. પણ કડવી વાસ્તવિકતા એ છે કે સૌથી વધુ વરસાદનો વૈભવ ધરાવતા કપરાડામાં ઉનાળો શરૂ થતાં જ પાણીની અછત સર્જાઈ છે. કપરાડા નર્મદા કલ્પસર અને પાણી પુરવઠા મંત્રી જીતુ ચૌધરીનો મતવિસ્તાર છે.પાણીની સમસ્યા અંગે મંત્રીને પણ અનેકવાર રજૂઆત કરી છે.2017માં PM નરેદ્ર મોદીએ 500 કરોડના ખર્ચે એસ્ટોલ પાણી જૂથ યોજનાનું ખાતમુહૂર્ત કર્યું હતું.જેમાં દણગંગા નદી પર બનેલા મધુબન ડેમમાંથી પાણી લિફ્ટ કરી ડુંગર પર મોટી ટાંકાંમાં લાવવાની યોજના હતી. આ પાણી કપરાડાના 110 ગામ સુધી પહોંચાડવામાં આવશે તેવો દાવો કરવામાં આવ્યો હતો. જોકે જાહેરાત કર્યાને 5 વર્ષ વિત્યા છતાં હજુ સુધી યોજના પૂર્ણ નથી થઈ.
યોજના શરૂ થાય તો પાણીનો પ્રશ્ન થશે હલ
પાણીની સમસ્યા મુદ્દે vtvએ જ્યારે તાલુકા વિકાસ અધિકારી સાથે વાત કરી તો તેમને જણાવ્યું કે પીવાના પાણીની સમસ્યાનું સમાધાન કરી રહ્યા છાૃએ. અને એસ્ટોલ પાણી પુરવઠા યોજના પૂર્ણ થયા બાદ આ સમસ્યાનો કાયમી અંત આવશે. હાલ તો ગ્રામજનો પાણી માટે તરસી રહ્યા છે.500 કરોડના ખર્ચે તૈયાર થઈ રહેલી એસ્ટોલ જૂથ યોજના ઝડપથી અમલી કરવામાં આવે તેવી ગ્રામજનો હાલ માગણી કરી રહ્યા છે.