હવામાન / વડોદરામાં 40 કલાક બાદ ઓસરી રહ્યા છે પૂરના પાણી, રાજ્યમાં ભારે વરસાદની આગાહી

વડોદરામાં 14 કલાકમાં 20 ઇંચ વરસાદ ખાબકતાં પૂરની સ્થિતિ સર્જાઇ હતી. જેમાં અનેક લોકોનું સ્થળાંતર કરવામાં આવ્યું હતુ. તો કેટલાક લોકોને NDRFની ટીમ દ્વારા રેસ્ક્યું કરી બચાવવામાં આવ્યા હતા. જ્યારે હવે લોકોને પૂરના પાણીમાંથી તો રાહત મળી રહી છે પણ હવે લોકોને પીવાનું પાણી નથી મળી રહ્યું.

તો બીજી તરફ સરકાર પણ લોકોને ફુડ પેકેટ અને પાણી આપવાના કામમાં લાગી છે. વડોદરામાં થયેલા ભારે વરસાદ બાદ શહેરના મોટાભાગના વિસ્તારોમાં પાંચથી છ ફૂટ સુધીના પાણી ભરાયા હતા. જોકે હવે લોકોને રાહત મળી રહી છે.

વડોદરામાં તો રાહત મળી હોય એવું દેખાઇ રહ્યું છે, પરંતુ ગુજરાતમાં ભારેથી અતિભારે વરસાદની હવામાન વિભાગ દ્વારા આગાહી કરવામાં આવી છે. જેથી વડોદરાવાસીઓને રાહત મળશે કે હજુ પરિસ્થિતિ વણસી જશે એ કહી ન શકાય.

તો હવામાન વિભાગની અગાહીને પગલે રાજ્યમાં તમામ પરિસ્થિતિને પહોંચી વળવા રાજ્ય સરકાર સક્રીય બની છે ત્યારે આસપાસના રાજ્યોમાંથી પણ NDRFની ટીમ ગુજરાત બોલાવાઇ છે. જેમાં પુણેથી NDRFની ટીમ ગુજરાત પહોંચશે. ભારે વરસાદની સ્થિતીને ધ્યાને રાખી NDRFની વધુ ટીમો ગુજરાત બોલાવાઇ છે. જોકે પાડોશી રાજ્યોએ વધુ મદદ માટે તૈયારી દર્શાવી છે.